Britaniyalı Rebekka Hində korporativ şam yeməyindən sonra qida zəhərlənməsi diaqnozu qoyulub və nəticədə 13 orqanı və orqan hissələri çıxarılıb.

KONKRET.az Qaynarinfo-ya istinadən xəbər verir ki, Rebekka bildirib ki, tədbirdən sonra həmkarları tez bir zamanda sağalsa da, o, həftələrlə və aylarla özünü pis hiss etməyə davam edib. Antibiotiklərlə müalicə və həkim məsləhətlərindən sonra ona kompüter tomoqrafiyası təyin olunub.

Müayinələr zamanı onun qarın boşluğunda çoxsaylı törəmələr aşkarlanıb. Biopsiyalar göstərib ki, Rebekkada çox nadir görülən xərçəng növü – qarın boşluğunun psödomiksoması var. Bu xəstəlik zamanı selik və şiş hüceyrələri qarın boşluğunda toplanaraq ciddi fəsadlara yol açır. Xəstəlik artıq bir neçə daxili orqanın səthinə yayılıb və sıx toxumalı şişlər əmələ gətirib.

Rebekkaya iki mürəkkəb cərrahiyyə əməliyyatı tətbiq edilib. Nəticədə onun yumurtalıqları, uşaqlığı, yoğun bağırsağı və mədə-bağırsaq traktının bir hissəsi daxil olmaqla 13 orqanı çıxarılıb.

Bu əməliyyatlardan sonra Rebekka bədənindəki funksiyaların bir qismini kompensasiya etmək üçün gündə 60-a yaxın dərman qəbul etməyə məcbur qalıb. Həmçinin ona HIPEC adlı prosedur tətbiq edilib – bu, qızdırılmış kimyəvi müalicə məhlulunun birbaşa qarın boşluğuna yeridilməsi ilə qalan xərçəng hüceyrələrinin məhv edilməsi məqsədi daşıyır.

Səkkiz kimyaterapiya kursundan sonra aydın olub ki, xəstəlik geri çəkilməyib. Rebekka son eksperimental müalicə kursunu keçib, lakin bu müalicə ciddi əks təsirlərə səbəb olduğu üçün dayandırılıb.

Hazırda 40 yaşlı Rebekka sağalmaz diaqnozla yaşayır və nə qədər ömrünün qaldığını bilmir. Buna baxmayaraq, o, təslim olmaq əvəzinə, həyat keyfiyyətini qorumağa çalışır və nadir xəstəliklərə dair məlumatlılığı artırmağa çalışır.

“Normal yaşamağa çalışıram, əlbəttə ki, müəyyən dəyişikliklərlə. Sörfinqlə məşğul oldum, hava şarı ilə uçdum, it arabası sürməyi sınadım. İndi isə “Pseudomyxoma Survivor” fonduna vəsait toplamaq üçün 90 kilometrlik veloyürüşdə iştirak etdim”, deyə Rebekka bildirib.