ABŞ hesab edir ki, Rusiya qüvvələri Ukraynanın qətiyyətli müqavimətindən getdikcə məyus olur. Amma buna baxmayaraq, Moskva Ukraynaya getdikcə daha çox qoşun yeridir.

KONKRET.az Ukrayna mediasına istinadən xəbər verir ki, bu barədə Reuters-ə ABŞ müdafiə sektorunun yüksək vəzifəli rəsmisi bildirib.

Adının açıqlanmasını istəməyən məmur həmçinin bildirib ki, rus komandirləri kifayət qədər yanacaq və əsas maddi-texniki təminat hazırlamayıb və indi “uyğunlaşmağa” çalışırlar.

ABŞ Müdafiə Nazirliyinin sözçüsü bildirib ki, Vaşinqton “Ukraynanın qətiyyətli müqavimətinin” əlamətlərini görüb.

“Biz bilirik ki, onlar əldə etmək istədikləri irəliləyişə nail ola bilmədilər, xüsusən də şimalda. Onlar gördüklərindən, çox güclü müqavimətdən məyus oldular”.

O əlavə edib ki, Ukraynanın güclü müqaviməti Rusiya ordusunun hücumunu ləngidib.

ABŞ Müdafiə Nazirliyinin sözçüsü hesab edir ki, Moskva işğaldan əvvəl Ukrayna sərhədlərinə cəlb etdiyi 150 mindən çox hərbçinin yarıdan çoxunu köçürüb. Bir gün əvvəl ABŞ Ukraynadakı Rusiya qüvvələrinin sayını bu rəqəmin 30%-i kimi qiymətləndirmişdi.

ABŞ hesab edir ki, Rusiya qoşunları hazırda Kiyevdən 30 km şimaldadır, lakin bu, hər an dəyişə bilər. Bundan başqa, Rusiya Ukrayna hədəflərinə əsasən qısa mənzilli 250-dən çox raket atıb, onlardan bəziləri mülki infrastrukturu vurub.

Agentlik bildirir ki, ABŞ Müdafiə Nazirliyinin sözçüsü həmçinin bildirib ki, Amerika silahlarının əvvəllər bəyan edilməmiş partiyası son günlərdə Ukraynaya gəlib.

“Mən sizə təsdiq edə bilərəm ki, onlar bizdən son bir neçə gündə böyük miqdarda yardımı alıblar”, – deyə rəsmi bildirib.

Qeyd edək ki, şənbə günü Britaniya Müdafiə Nazirliyi Ukraynadakı müharibə ilə bağlı yenilənmiş kəşfiyyat məlumatlarını paylaşıb, ona görə də Rusiyanın hücum sürəti “müvəqqəti olaraq ləngiyib”.

Rəsmiyyə Şərifova,

KONKRET.az