Pekində Çin–Aİ diplomatik münasibətlərinin qurulmasının 50 illiyi münasibətilə keçirilən sammitdə Avropa Komissiyasının rəhbəri Ursula fon der Lyayen Avropa İttifaqı ilə Çin arasında münasibətlərin “qırılma nöqtəsində” olduğunu bəyan edib.

KONKRET.az xəbər verir ki, “The Washington Post”un yaydığı məlumata görə, Fon der Lyayen bildirib ki, Rusiya-Ukrayna müharibəsi və ticarət qarşıdurmaları fonunda tərəflər arasında “balansın yenidən qurulmasına” ehtiyac var. Aİ liderləri Çindən ədalətli ticarətə keçidi və dempinq siyasətindən əl çəkməyi tələb edirlər. Eyni zamanda Pekindən Rusiyaya təsir edərək müharibənin başa çatdırılmasına yardımçı olması da istənilib.

Çin isə Aİ ilə münasibətləri gücləndirmək niyyətindədir — xüsusilə də Avropa ilə ABŞ arasında gərginliyin artdığı və Donald Trampın Aİ məhsullarına 30 faiz rüsum tətbiq etmək hədəsini səsləndirdiyi bir vaxtda.

Pekin müəyyən simvolik güzəştlərə də gedib — Avropa Parlamenti deputatlarına qarşı tətbiq etdiyi sanksiyaları ləğv edib və nadir torpaq elementlərinin ixracı üçün “yaşıl dəhliz” təklif edib.

Fon der Lyayen əlavə edib ki, Pekinin Moskva ilə sıx əlaqələri gələcək Çin–Aİ münasibətlərində “müəyyənedici amil” olacaq. Aİ-də Çinin Avropanın prinsipiallığını və qərarlılığını yetərincə dəyərləndirmədiyi fikri güclənməkdədir.

Natiq Səlim,
KONKRET.az