Siyasi Menecment İnstitutunun direktoru, politoloq Azər Qasımlının barəsində olan cinayət işi üzrə məhkəmə prosesi davam edib.

KONKRET.az xəbər verir ki, Bakı Ağır Cinayətlər Məhkəməsində hakim Telman Hüseynovun sədrliyi ilə keçirilən prosesdə zərərçəkmiş Qurbanəli Yusifovun nümayəndəsi çıxış edib.

Nümayəndə bildirib ki, zərərçəkmişlə yeni müqavilə bağlayıb, cinayət işi ilə tanış olmayıb. O, məhkəmənin təxirə salınmasını, ona işlə tanış olması üçün vaxt verilməsini istəyib.

A.Qasımlının vəkilləri buna etiraz ediblər.

Vəsatət təmin edilməyib.

Daha sonra zərərçəkmiş qismində Q.Yusifov ifadə verib. O bildirib ki, təqsirləndirilən şəxslə heç bir düşmənçiliyi yoxdur. Onun sözlərinə görə, dostluq münasibətləri olub və bir-birinin evinə qonaq gediblər: “Biz Real partiyasından tanış olmuşuq. Mən partiyanın iclaslarında iştirak etmişəm. Partiyadan ayrılandan sonra da münasibətlərimiz olub”.

Zərərçəkmişin sözlərinə görə, A.Qasımlı ona borclu olduğunu iddia edir: “Mənim şəxsə borcum olmayıb. Bizim işbirliyimiz olub. Kriptovalyuta işi ilə əlaqəm olub. Bununla bağlı mənim çıxışlarım da var. Mən çıxışlarımda bunun qazancı olduğu kimi, risklərini də izah etmişəm. Azər Qasımlı da bu işlə məşğul olmaq istəyib. Ona da qazancla yanaşı, uduzmaq riski olduğunu demişəm. Mənim heç vaxt hesabdan çıxarış etmək imkanım olmayıb. Bununla bağlı mən kommersiya məhkəməsində demişəm”.

Zərərçəkmiş qeyd edib ki, Azər Qasımlı işə 20 min dollar yatırım edib: “Sonra müharibə dövründə internet olmayan vaxt birjalarda kriptovalyutalar dəyər itirdi. Azər ziyanın əvəzi olaraq bitkoin tələb eləməyə başladı. Axırda onunla mübahisə nəticəsində pulunu qaytarmağa razılaşmışdım. Sadəcə, o məndən pul yox, bitkoin tələb edib. Birinci dəfə təzyiq altında 45 min dollar borclu olmağım barədə sənəd imzalatdırdı. O sənədi Azərin həyat yoldaşı Samirənin ofisində imzalamışam. Tez-tez zəng elədi, onun əlindən ölkədən getdim. Sonra mənə zəng edib ailə üzvlərimi hədələyirdi, uşağımı qaçıracağını deyirdi. Mənə Türkiyə nömrəsi ilə zəng edib deyirdi ki, sən harada olsan, tapacam”.

Məhkəmə prosesi sentyabrın 10-da davam edəcək.

İttihama görə, Azər Qasımlı zərərçəkmiş Qurbanəli Yusifovdan hədə-qorxu yolu ilə pul tələb edib.

Belə ki, A.Qasımlı kriptovalyuta oyunları üzrə gəlir əldə etmək üçün qeydiyyatdan keçib və daha sonra tanışı Q.Yusifovun da adını qazanc əldə etmək üçün qeydiyyata salıb. Daha sonra gəlir aşağı düşdüyü üçün zərərçəkmişi günahlandırıb. Ondan 45 min ABŞ dolları tələb edib. Əks halda, özünü, ailə üzvlərini öldürəcəyi, azyaşlı uşağını oğurlatdıracağı ilə hədələyib, ondan həmin məbləği tələb etməyə başlayıb. Bundan sonra o, hədə-qorxu yolu ilə zərərçəkmişlə görüşüb, onu 10 min dollar borcu olması barədə sənədə etirafedici imza atmağa məcbur edib.

Bundan savayı, A.Qasımlı zərərçəkmiş şəxsə mesaj yazıb, azyaşlı övladının oxuduğu məktəbin yerini deməklə onu oğurladacağı ilə hədələyib. Bu yolla zərərçəkmişdən 6800 manat almağa nail olub.

İttihama münasibət bildirən təqsirləndirilən şəxs ona elan olunmuş ittiham üzrə özünü təqsirli bilməyib. O özünün zərər çəkdiyini bildirib.