“Bəlkə Ermənistan Rusiyaya qarşı vuruşmağa hazırlaşır?”.

KONKRET.az xəbər verir ki, bu barədə Ermənistanın informasiya təhlükəsizliyi üzrə eksperti Karen Vrtanesyan bildirib. O, təklif olunan qanun dəyişikliklərinə münasibət bildirib.

“Hərbi vəziyyət haqqında” qanuna dəyişikliklərdə evlərdə axtarış aparılması, avadanlıqların müsadirə olunması, internetin bağlanması nəzərdə tutulur.

Əgər müharibə Azərbaycana və ya Türkiyəyə qarşı olmalıdırsa, o zaman Ermənistanda niyə insanlardan telefonlar və ya printerlər müsadirə edilməli, insanlar üçün internet bağlanmalıdır? Bu gün Ermənistan əhalisinin böyük əksəriyyəti, xüsusən də müxalifəti açıq-aşkar anti-Türkiyə mövqeyindən çıxış edir, qalanları isə, ən azı, biganə münasibət sərgiləyir.

Yeganə türkyönlü insanlar “Vətəndaş müqaviləsi” partiyasında onun lideri və siyasi müttəfiqləridir. Nəzərinizə çatdırım ki, bu yaxınlarda bu rəhbər dedi ki, ona türk deyəndə incimir.

Bütün bunlar bir-birinə uyğun gəlmir, elə deyilmi?

İkinci “qəribəlik”: Əgər müharibənin bərpasını gözləyirlərsə, onda niyə KTMT ölkələri ilə hərbi-texniki əməkdaşlıqdan imtina etdiklərini deyirlər?

Əgər siz Türkiyə və Azərbaycanın təcavüzündən özünüzü qorumağa hazırlaşırsınızsa, o zaman KTMT sizə lazım olan siyasi bəyanatı verməsə belə, niyə hərbi-texniki əməkdaşlıqdan imtina edirsiniz?

Haradasa bu qanunvericilik dəyişikliklərinin müzakirəsi diqqətimi çəkdi.

Şərhlərdə təklif olunan düzəlişləri müdafiə edən hökumətyönlü təbliğatçılardan biri “Ukraynada da belə edirlər” deyir.

Oxudum və nəhayət məni narahat edənin nə olduğunu başa düşdüm.

Məncə, bəlkə bunlar Rusiyaya qarşı müharibəyə hazırlaşır? Və güman etmək olar ki, onlar “rusiyapərəst” mövqedə ittiham olunanları axtaracaqlar.

Yaxud bu yaxınlarda “Ermənistanın suverenliyinə çağırış” ittihamı ilə qanun layihəsini qəbul etməyə çalışdılar”, – deyə Vrtanesyan bildirib.

Xuraman Etibarlı,

KONKRET.az