Bir sıra ölkələr Vaşinqtonda Azərbaycan, Ermənistan və ABŞ liderlərinin görüşünün nəticələrini dəstəklədiklərini açıqlayıblar.
KONKRET.az xəbər verir ki, Türkiyə Vaşinqtondakı görüş və imzalanan sənədi regional sabitlik və davamlı sülh üçün mühüm addım kimi dəstəkləyir, bu prosesdə ABŞ-ın vasitəçiliyini yüksək qiymətləndirir və Azərbaycanla həmrəyliyini bir daha ifadə edir. Bu dəstək regionda yeni əməkdaşlıq və inkişaf üçün geniş imkanlar yaradır.
Almaniya Xarici İşlər Naziri bu mərhələnin Ermənistan və Azərbaycan tarixində yeni bir səhifə açdığını bildirib və ABŞ-ın təşəbbüsü ilə həyata keçirilən vasitəçilik səylərinin onilliklərdir davam edən münaqişədən sonra milyonlarla insan üçün ümid yaratdığını vurğulayıb.
İtaliya Xarici İşlər Nazirliyi isə tarixi bir razılaşmanın imzalanmasını suverenlik və ərazi bütövlüyü əsasında normallaşma istiqamətində mühüm addım kimi qiymətləndirərək, ABŞ-ın vasitəçiliyinə və bölgədə sülh, sabitlik və inkişaf üçün yaradılan imkanlara təşəkkürünü ifadə edib.
Səudiyyə Ərəbistanı Xarici İşlər Nazirliyi imzalanan sülh sazişini alqışlayaraq, ABŞ-ın dəstəyini yüksək qiymətləndirib.
Qətər Xarici İşlər Nazirliyi bu razılaşmanın iki ölkə arasında qonşuluq prinsiplərinə əsaslanan əməkdaşlığın yeni mərhələsinin təməlini qoyacağına ümid etdiyini bildirib.
Bununla yanaşı, Tacikistan Prezidenti bu tarixi hadisəni salamlayaraq, sülh dialoqunun böhranların və münaqişələrin yeganə həlli yolu olduğunu qeyd edib.
Bu rəsmi dəstəklər bölgədə davamlı sülh və qarşılıqlı anlaşma perspektivlərinin gücləndirildiyini göstərir.
Natiq Səlim,
KONKRET.az