“Azərbaycan Respublikasının Əmək Məcəlləsinə əsasən, mağaza işçiləri də digər sahələrdə çalışanlarla eyni hüquq və vəzifələrə malikdirlər”.

Bu fikirləri hüquqşünas Tağı Hüseynov KONKRET.az-a açıqlamasında səsləndirib:

“Qanunvericiliyə görə, 5 günlük iş həftəsində işçilərə mütləq şəkildə iki gün, adətən şənbə və bazar istirahət verilməlidir. 6 günlük iş həftəsində isə yalnız bir gün istirahət nəzərdə tutulur”.

Onun sözlərinə görə, əmək məcəlləsində mühüm bir müddəa da yer alır: Bir iş günü ilə növbəti arasında azı 12 saat fasilə olmalıdır.

“Məsələn, vətəndaş bu gün işə gəlibsə, üzərindən 5 saat keçdikdən sonra onu yenidən işə çağırmaq olmaz. Bu fasilə ən azı 12 saat olmalıdır,” – deyə hüquqşünas vurğulayıb.

Tağı Hüseynov qeyd edib ki, nahar fasiləsi iş saatına daxil edilmir və adətən 1 saat müddətində verilir. İşçilərin istirahət vaxtı və rejimi isə müəssisənin tərtib etdiyi cədvəllə tənzimlənir.

Aynurə İsmayıl

KONKRET.az