“Bu ilin ortalarına doğru Ermənistanda sosial-iqtisadi vəziyyət kəskin pisləşə bilər. Hökumətin 2025-2027-ci illər üçün Ortamüddətli Xərclər Proqramında (MTEP) artım nəzərdə tutulmadığından istər minimum əməkhaqqı, istərsə də pensiyalarda mənfi amillər dərinləşəcək, əhalinin yoxsullaşması davam edəcək”.

KONKRET.az xəbər verir ki, bu barədə “Ermənistanın səsi” qəzeti yazıb.

Nəşr vurğulayır ki, qarşıdan gələn çöküşün əlamətləri getdikcə özünü büruzə verir: “Bu, əsas makroiqtisadi göstəricilərin (iqtisadi aktivlik, sənaye istehsalı, xarici iqtisadi fəaliyyət və s.) artım tempinin aşağı düşməsi və dövlət xəzinəsinə vergi daxilolmalarının çatışmazlığı və ölkəyə turist axınının azalmasıdır. Ermənistana pul köçürmələri də azalıb”.

Yazının müəllifi Aşot Aramyan daha sonra qeyd edir ki, Nikol Paşinyan hökumətinin ümumi fəaliyyət proqramının və xüsusən də “Ümumi təhsil və məktəbəqədər təhsil müəssisələrinin təməlinin qoyulması, tikintisi, təkmilləşdirilməsi” proqramının başa çatmasına iki il qalsa da, cəmi 25 faiz iş yerinə yetirilib.

Mənfi hadisələrin yumşaq ssenarisinə görə – Rusiya-Ukrayna və Rusiya-Qərb qarşıdurması nəticəsində Ermənistan iqtisadiyyatı üçün yaranmış əlverişli xarici amillər tədricən zəifləyib. Respublikada iqtisadi artım tempi nəzərdə tutulan 5 faiz əvəzinə 3-5%-dən çox olmayacaq.

Dövlət büdcəsinə cari vergi daxilolmaları əhəmiyyətli dərəcədə azalıb. Ermənistan hökumətinin borcu kəskin artıb. 2027-ci ilin sonunda dövlət borcunun 7,4 trilyon dram (hazırkı məzənnə ilə təxminən 19 milyard dollar – red.) təşkil edəcəyini nəzərdə tutulur. Bu, 2024-cü ilin sonunda gözlənilən dəyərdən 43,5% çoxdur.

Dövlət borcunun ölkənin ÜDM-dəki payına gəlincə, 2026 və 2027-ci illərdə cari illə müqayisədə 4,5 faiz bəndi artaraq 55 faiz təşkil edəcək. İqtisadi müşahidəçilər belə qənaətə gəlir ki, bu, ən yaxşı ssenaridir.

Qeyd edək ki, iyunun 1-nə Ermənistanın dövlət borcu 12 milyard dolları ötüb.

Natiq Səlim,

KONKRET.az