Siyasi gərginliklərin fonunda belə, ABŞ və Rusiya arasında kosmos sahəsində əməkdaşlıq davam edir. 27 noyabr tarixində iki ölkənin astronavtları birgə şəkildə “Soyuz MS-28” kosmik gəmisi ilə Beynəlxalq Kosmik Stansiyaya (BKS) uğurla göndərilib.

KONKRET.az xəbər verir ki, missiya NASA və “Roskosmos” agentlikləri arasında mövcud olan əməkdaşlıq çərçivəsində həyata keçirilib.

Kosmik gəmidə ABŞ astronavtı və iki rus kosmonavt yer alıb. Onların əsas vəzifələri BKS-də elmi tədqiqatlar aparmaq, texniki xidmətlər göstərmək və stansiyanın fəaliyyətini dəstəkləmək olacaq. Missiya həm də tərəflər arasında qarşılıqlı etimadın, xüsusən də yüksək texnoloji sahələrdə əməkdaşlığın qorunduğunu nümayiş etdirir.

Analitiklər bildirirlər ki, bu cür birgə layihələr geopolitik gərginliklərin kosmos sahəsinə təsir etmədiyini göstərir və beynəlxalq kosmik əməkdaşlığın strateji əhəmiyyətini bir daha ortaya qoyur. ABŞ və Rusiya artıq uzun illərdir BKS layihəsində birgə çalışır və bu missiya da həmin ənənənin davamı hesab olunur.

Müşviq Tofiqoğlu
KONKRET.az