Azərbaycanda pandemiya nəzarətdə saxlanılır, vəziyyət stabil və idarə olunandır. Yoluxma sayı getdikcə azalır.

KONKRET.az xəbər verir ki, bunu Trend-ə açıqlamasında infeksionist-hepatoloq Mərdan Əliyev deyib.Onun sözlərinə görə, hazırda dünyanı bürüyən “Omikron” ştammı qonşu ölkələrdə sürətlə yayılmaqdadır. Bu, ölkəmiz üçün riskin çox yaxın olduğunu bildirir. Lakin “Omikron” ştammın ölkəmizə gəlməməsi üçün lazımi tədbirlər görülməlidir.

“Vətəndaşlarımız virusun yeni və sürətlə yayılan təhlükəli variantlarından qorunmağın ən effektiv yolunun vaksinasiya olunduğunu unutmamalıdırlar. İkinci doza vaksinasiya olan kifayət qədər vətəndaşımız var. Buna baxmayaraq üçüncü dozanı vurdurmaq tövsiyə olunur. Vaksinin üçüncü dozasını vurduranlar xəstəliyi bir neçə dəfə yüngül keçirirlər. Üçüncü doza vaksin olunmanı altı ayı gözləmədən vurdurmaq lazımdır. Vaksinin üçüncü dozasını vurduranlar koronavirusa az yoluxur, yoluxarsa da xəstəliyi bir neçə dəfə yüngül keçirirlər. Azərbaycanda digər ölkələrdəki kimi sərt tədbirlər tətbiq olunmayıb. Lakin bayram günlərində insanlar daha çox qapalı məkanlarda vaxt keçirəcəklər. Buna görə də təhlükəsizlik tədbirləri unudulmamalı, karantin rejiminin tələbləri yerinə yetirilməlidir. Yoluxma dalğasının genişlənəcəyi və əhaliyə, ölkənin səhiyyə sisteminə təhlükə yaranacağı təqdirdə karantin rejiminin sərtləşdirilməsi mümkündür”, – deyə o bildirib.

Son sutka ərzində yeni yoluxma hallarının müəyyənləşdirilməsi ilə əlaqədar 8 784, ötən müddət ərzində isə ümumilikdə 5 832 974 test aparılıb.