Son dövrlərdə ölkədə iri və xırda buynuzlu heyvanların sayında kəskin azalma müşahidə olunur.

KONKRET.az xəbər verir ki, mövzu ilə bağlı Kənd Təsərrüfatı Nazirliyindən Modern.az-a bildirilib ki, bunun əsas səbəbi ət istifadəsinin çox olmasıdır.

Qeyd edilib ki, heyvanlar çəkiyə dolmamış kəsilib ətindən istifadə edilir:

“İnsanlar quzu əti yeməyə çox üstünlük verir ki, bu da heyvanların baş sayının artmasına imkan vermir. İllərlə əhalinin sayının artması, ətə olan tələbatın çoxalması səbəbindən heyvanların sayı artmır. Bununla bağlı maarifləndirmə tədbirləri aparılsa da, təəssüf ki, müsbət nəticəsinə rast gəlinmir”.

Dövlət Statistika Komitəsinin məlumatına görə, 2025-ci il yanvarın 1-i vəziyyətinə ölkə üzrə 6850,2 min baş qoyun və keçi, 2459,7 min baş iribuynuzlu mal-qara, o cümlədən 1223,1 min baş inək və camış mövcud olub. 2025-ci il yanvarın 1-i vəziyyətinə donuzıların sayı 3 103 baş olub.

Rəsmi statistikaya görə, ölkədə xırda və iribuynuzlu mal-qaranın sayı ötən illə müqayisədə azalıb. Belə ki, bu azalma həm inək və camışların sayında (ötən il 1 235,1 baş olub), həm də qoyun və keçilərin sayında (ötən il 7 060,6 baş olub) özünü göstərir.

Azalma eyni zamanda donuzların da sayında baş verib (ötən il 4 828 baş olub).

Qeyd edək ki, son vaxtlar Azərbaycanda ət bahalaşmağa davam edir. Hazırda mal ətinin qiyməti 15-16 manata satılır, qoyun ətinin qiyməti isə 20-24 manat arasında dəyişir.