“Ermənistan İranla əlaqələri inkişaf etdirməyə davam edəcək”.

KONKRET.az xəbər verir ki, bunu Ermənistan Təhlükəsizlik Şurasının katibi Armen Qriqoryan bildirib.

“Ermənistan və İran strateji prioritetlərdən biri kimi ərazi bütövlüyü məsələsində yüksək səviyyədə qarşılıqlı anlaşmaya malikdir. Biz İranla əlaqələri yüksək qiymətləndiririk”, – deyə o, Ermənistanın İctimai Televiziyasının efirində bildirib.

Qriqoryanın sözlərinə görə, Ermənistanla İran arasında münasibətlər həm də o kontekstdə strateji xarakter daşıyır ki, əlaqələr açıq və səmimi dialoq çərçivəsində qurulub.

“Biz bu əlaqələri başqa ölkələrlə bağlamırıq. Təbii ki, Ermənistan sanksiyalara tam əməl edir, lakin biz İranla işləyirik və strateji prioritetlərimizə aid bir çox məsələlərdə İranın mövqeyini yüksək qiymətləndiririk”.

Müxalifət düşərgəsinin Avropa müşahidə missiyasının müşahidəçilərinin İran ərazilərində kəşfiyyat aparması ilə bağlı səsləndirdiyi fikirləri şərh edən Təhlükəsizlik Şurasının katibi bildirib ki, İrəvan bütün mövcud məsələləri Tehranla yüksək və yüksək səviyyədə müzakirə edir.

“İran problem qaldırarsa, biz onu həll etməyə çalışırıq. Biz bu istiqamətdə işimizi davam etdirəcəyik”, – deyə o, iki ölkə arasında, o cümlədən narahatlıq doğuran məsələlərlə bağlı çox intensiv dialoqun olduğunu bildirib.

Qərblə münasibətlərin dərinləşməsinin İranla münasibətlərə xələl gətirə bilməyəcəyini deyən Qriqoryan qeyd edib ki, Ermənistan hər iki tərəflə müzakirələr aparır.

“Ermənistan-ABŞ və Ermənistan-Aİ münasibətləri bir istiqamətdir. Ermənistan-İran münasibətləri isə bizim işlədiyimiz başqa istiqamətdir. Hesab edirəm ki, hər iki tərəfdə Ermənistanın bu mövqeyi ilə bağlı anlayış var. Biz şəffafıq, bu kontekstdə gizli heç nə etmirik”, – deyə o vurğulayıb.

Natiq Səlim,

KONKRET.az