İran mediasında Əli Laricaninin ölkənin Ali Milli Təhlükəsizlik Şurasının katibi təyin olunacağı ilə bağlı xəbərlər yayılıb. Ekspertlər bunu uzun müddət İran siyasətinin mühüm hissəsini təşkil etmiş Laricani klanının potensial siyasi dönüşü kimi qiymətləndirirlər.

KONKRET.az xəbər verir ki, Əli və onun dörd qardaşı – Sadıq, Məhəmməd Cavad, Fazil və Baqir – son 20 ildə İran parlamenti, məhkəmə sistemi və diplomatik arenada əsas fiqurlar olublar. Onların ailəsi, İslam Respublikasının baniləri ilə sıx əlaqələri, düzgün evlilik ittifaqları və geniş patronaj şəbəkələri sayəsində ölkənin əsas siyasi dayaqlarında yer almışdı. İran cəmiyyətində onları tez-tez “İranın Kennediləri” adlandırırdılar.

Əli Laricani 2005–2007-ci illərdə Ali Təhlükəsizlik Şurasının katibi olub, daha sonra 2008–2020-ci illərdə İran parlamentinə (Məclis) rəhbərlik edib. Qardaşı Sadıq isə 2009–2019-cu illərdə ölkənin məhkəmə sisteminə rəhbərlik edib və Konstitusiyanın Qoruyucular Şurasının üzvü olub. Digər qardaşlar da diplomatiya, səhiyyə və təhsil sahələrində yüksək vəzifələr tutublar.

Lakin siyasi çevrələrdə tez-tez mövqe dəyişmələri – gah islahatçılarla, gah mühafizəkarlarla birləşmələri – nəticəsində klan nə bu, nə də digər tərəfdən dəstək qazana bilmədi. Bu ikili oyun onların siyasi uduzmasına gətirib çıxardı. Xüsusilə Əli Laricaninin nüfuzu 2015-ci ildə nüvə sazişini dəstəkləməsi və sonradan islahatçıların təşəbbüslərini bloklaması ilə ciddi zərbə aldı.

Mühafizəkarlar tərəfindən tənqidə məruz qalan klan, nəticədə siyasətdən sıxışdırıldı. Əli Laricani spiker vəzifəsindən uzaqlaşdırıldı və formal müşavir vəzifəsinə keçirildi, digər qardaşlar isə arxa plana atıldı.

Ancaq bu günlərdə Tehranda konfiqurasiyanın yenidən dəyişə biləcəyi ehtimalları artır. Yeni siyasi döyüşlər ərəfəsində, ölkənin gələcək Rəhbərinin kim olacağı ilə bağlı qarşıdurmalar fonunda, neytral vasitəçiyə ehtiyac yarana bilər. Elə bu səbəbdən, Əli Laricaninin yenidən təhlükəsizlik şurasına qayıtması real görünür – hərçənd keçmiş güc və təsirini bərpa etməsi gözlənilmir.

Beləliklə, İranın siyasi səhnəsində uzun fasilədən sonra Laricani klanının adı yenidən hallanır. Onlar bir daha ölkənin taleyində mühüm rol oynaya bilər – heç olmasa, qısa müddətə.

Natiq Səlim,
KONKRET.az