İsrailin paytaxtı Qüdsdə polis ABŞ vətəndaşlığı olan iki şəxsi saxlayıb. Hadisə avqustun 21-də şəhərə giriş hissəsində baş verib. Yerli mətbuatın yazdığına görə, saxlanılanlar gizli obyektin foto və video çəkilişini apararkən aşkarlanıblar.

KONKRET.az xəbər verir ki, Qüds polisinin yaydığı ilkin məlumatda saxlanılan şəxslərin hər ikisinin ABŞ pasportu daşıdığı və hazırda İsraildə təhsil aldıqları bildirilir. Onların Qüdsdə dini və akademik təhsil aldıqları, hadisə zamanı isə mobil telefon və digər çəkiliş avadanlığından istifadə etdikləri açıqlanıb.

Polis əməkdaşlarının müdaxiləsi ilə çəkiliş prosesi dərhal dayandırılıb və gənclər saxlanılaraq istintaqa cəlb olunublar. Hazırda onların məqsədinin nə olduğu, çəkilişlərin şəxsi maraq, sosial şəbəkə fəaliyyəti, yoxsa digər səbəblərlə bağlı olub-olmadığı araşdırılır.

İsrail qanunlarına görə, hərbi və ya strateji əhəmiyyət daşıyan obyektlərin çəkilişi qəti şəkildə qadağandır. Bu qadağanın pozulması casusluq və ya dövlət təhlükəsizliyinə təhdid kimi qiymətləndirilə bilər. Hüquq-mühafizə orqanları bildiriblər ki, saxlanılan amerikalıların telefonlarında və kompüterlərində çəkilən materialların təhlili aparılır.

ABŞ-ın İsraildəki səfirliyi artıq hadisədən xəbərdar edilib. Diplomatik nümayəndəlik hadisə ilə bağlı rəsmi şərh verməkdən imtina etsə də, saxlanılanların hüquqlarının qorunması üçün prosesdə iştirak edəcəklərini açıqlayıb.

Məsələ ilə bağlı istintaq davam edir və yaxın günlərdə saxlanılan şəxslərin məhkəmə qarşısına çıxarılıb-çıxarılmayacağına dair qərar veriləcək.

Müşviq Tofiqoğlu

KONKRET.az