Fransa və Almaniya arasındakı əlaqələr Avropa sabitliyinin açarıdır. Hər iki ölkə Avropada hökm sürən enerji böhranı ilə bağlı fikir ayrılıqları yaşayır.

KONKRET.az xəbər verir ki, bu barədə “Modern Diplomacy” portalı yazıb.

Bildirilib ki, hər iki ölkə qitənin ən əhəmiyyətli iki iqtisadiyyatına malikdir. Onlar Aİ-nin sütunları hesab olunurlar. Lakin Rusiya-Ukrayna müharibəsi başlayanda iki ölkə arasında enerji, müdafiə, iqtisadiyyat kimi məsələlərdə yenidən fikir ayrılığı yaranıb. Boşluq Rusiya qazının çatışmazlığı və onun iqtisadiyyata təsiri ilə daha da dərinləşib. Bu böhran Avropa iqtisadiyyatının kövrəkliyini nümayiş etdirdi. Bundan əlavə, böhran bütövlükdə Aİ-nin öz vətəndaşlarının tələblərini ödəyə bilib-bilməyəcəyi ilə bağlı narahatlıqları artırıb.

Nəşr qeyd edib ki, əsas mübahisə enerji və müdafiə sahələrindədir. Sentyabrın sonunda Almaniya 200 milyard avro dəyərində böyük enerji dəstəyi paketi elan edib. Müharibənin öz enerji xərclərinə təsirindən narahat olan Paris və digər Avropa paytaxtlarında Almaniyanın birtərəfli qaydada 200 milyard avro xərcləməsi böyük səs-küyə səbəb olub.

Müdafiə məsələsinə gəlincə, bunu Berlinin son hərbi satınalma qərarları sübut edir. Almaniya yeni yaratdığı 100 milyard avroluq investisiya fondunun bir hissəsini ABŞ-ın “F-35” qırıcılarına xərcləmək qərarına gəlib və bu, Parisi qıcıqlandırıb.

Bu satınalmalar Fransa ilə yeni nəsil qırıcı təyyarələrin və tankların hazırlanmasında uzun müddət davam edən əməkdaşlıq səylərinə ciddi zərbə olub.

Aİ-nin enerji siyasətində fikir ayrılıqları yanacaq böhranı ilə bağlıdır.

Qeyd edək ki, enerji tədarükün kəsilməsi Almaniya iqtisadiyyatının dayanıqlılığına birbaşa təhlükə yaradır. Hal-hazırda nüvə və alternativ enerjiyə arxalanan Fransa isə Rusiya qazından daha az asılıdır.

İqbal Rzayev,

KONKRET.az