Ekologiya və Təbii Sərvətlər Nazirliyi Bakıda neftlə çirklənmiş torpaqların təmizlənməsi üçün 2024-2030-cu illər üzrə yeni dövlət proqramı hazırlayıb, hökumətə təqdim edib.

KONKRET.az xəbər verir ki, bunu Milli Məclisin Təbii ehtiyatlar, energetika və ekologiya komitəsinin iclasında ekologiya və təbii sərvətlər nazirinin müşaviri Rasim Səttarzadə bildirib.

“Neftli ərazilər Abşeron yarımadasının uzun onilliklərinin problemidir”, – deyə o qeyd edib.

Bundan başqa, nazirin müşaviri deyib ki, sahibkarlıq subyektlərinin yoxlamalardan azad edilməsi bəzən problem yaradır: “Zavodlardan ətraf mühitə külli miqdarda tullantı atılır. Bizim səlahiyyətimiz yoxdur ki, zavoda daxil olub monitorinq edək. Halbuki, biz sübut etməliyik ki, bunun əhaliyə ciddi mənfi təsiri var. Buna görə də özəl sektorun, sahibkarların özlərinin korporativ məsuliyyəti olmaldır. Məncə iş adamlarını cəzalandırmağa deyil, onların bütün məsələləri korporativ məsuliyyətlə yanaşmasına çalışmalıyıq”.