Politoloq: “Sahibə Qafarova özündən əvvəlki spikerlərin səhvini təkrarlayır”backend

Politoloq: “Sahibə Qafarova özündən əvvəlki spikerlərin səhvini təkrarlayır

“Milli Məclisin sədri Sahibə Qafarova özündən əvvəlki spikerlərin səhvini təkrarlayır. Fikrimcə, spiker hər deputatın çıxışındakı etiraza reaksiya verməli deyil”.

Bu fikirləri KONKRET.az-a açıqlamasında politoloq Elxan Şahinoğlu səsləndirib. Politoloq bildirib ki, bugünkü plenar iclasda deputat Azay Quliyev döyüş bölgəsində qulluq edən hərbi qulluqçulara ikiqat pul verilməsindən və yaranmış yeni situasiya ilə əlaqədar ödənişlərin fərqli şəkildə həyata keçirilməsindən bəhs edib: “Bu mövzu deputatlarla yanaşı sıravi vətəndaşları da narahat edir, çoxluğun fikri belədir ki, ağır şəraitdə qulluq edən həbrçilərin maaşlarını azaltmaq olmaz. Sahibə Qafarova isə Azay Quliyevin çıxışına belə reaksiya verib ki, “Hazırda Qarabağ döyüş bölgəsi deyil”. Necə yəni döyüş bölgəsi deyil? Məgər Dağlıq Qarabağdakı separatçıları tam tərksilah etmişik? Hərbçilərimiz 10 noyabdan sonra bir neçə dəfə anti-terror əməliyyatları həyata keçiriblər, itkilər vermişik və yeni toqquşmalar istisna deyil. Qarabağda qulluq edən hərbçilərimiz gələcəkdə də separatçıları təksilah edəcək və bu zaman mina risqi ilə üz-üzə qalacaqlar”.

Elxan Şahinoğlu qeyd edib ki, deputat Fazil Mustafa plenar iclasda bir başqa mövzuya toxunub. Belə ki, millət vəkili ölkədə idman zallarının açılması məsələsini ən ali tribunadan qaldırdıqlarını deyib: “Dəfələrlə də bu məsələni qaldırmışıq, amma reaksiya verən yoxdur. Bu yerlərdə çalışan əhali dolana bilmir. Artıq əhali arasında yoxsullaşma gedir. Heç olmasa, cavabdeh qurumlar çıxıb desin ki, istəyirik əhali yoxsullaşsın, istəmirik idman zalları açılsın, məqsədə uyğun deyil. Reaksiya versinlər. Biz məsələni burada qaldırırıq, burada da qalır”. Spiker Sahibə Qafarova isə Fazil Mustafaya deyib ki, Nazirlər Kabineti yanında Operativ Qərargah bu məsələyə münasibət bildirib: “İdman zallarının açılmamasının səbəbi pandemiyadır”. Yəni spiker deputata dolayısı ilə irad bildirib ki, Operativ Qərargah vəziyyəti sizdən yaxşı bilir.

Politoloq əlavə edib ki, insanları metronun niyə açılmaması da narahat edir, çünki avtobuslar dolub-daşır və yerüstü nəqliyyat vasitələri virusun yayılma mənbəyinə çevrilib. Məgər Operativ Qərargah bunun həll yolunu tapıb?

“İddia etmirəm ki, spiker hər çıxış edən deputatın sözlərinə haqq qazandırmalı və ya susmalıdır. Ancaq spiker həm parlamenti, həm də parlamentdə olan deputatları təmsil edir. Spiker qaldırılan hər iki məsələdə daha konstuktiv mövqe ortaya qoya bilərdi, yəni həm hərbçilərin maaşlarının niyə fərqli hesablandığını, həm də virusla bağlı yeni açılmaların olub-olmayacağını aydınlaşdırmaq üçün müvafiq qurumların təmsilçilərini parlamentə dəvət edə bilər ki, deputatların suallarına cavab versinlər”, – deyə Şahinoğlu fikirlərini tamamlayıb.

Müşviq Tofiqoğlu

KONKRET.az

 

  • Ali
    Fevral 24, 2021 - 01:16

    Övladı bu yolu keçməyən başqa heç cür deyə bilməz.

Bir cavab yazın

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir

*

*

*