“Poz,qazan”la bağlı İRAD  – “Küçələrdə hərə bir taxta oturacaq düzəldərək insanları qumara sövq edir”backend

Poz,qazanla bağlı İRAD  - "Küçələrdə hərə bir taxta oturacaq düzəldərək insanları qumara sövq edir" 

Son zamanlar hər metro çıxışında, hər tində, hər küçədə “Poz,qazan” ani lotereyasının pərakəndə satış məntəqələri ilə rastlaşırıq. Bunun leqal olub-olmaması bir yana, onsuz da gündəlik çörək pulunu güclə qazanan kasıb insanlarının olan-qalan pulunun da başına daş salması ilə nəticələnir.

KONKRET.az bununla bağlı Gələcək Azərbaycan Partiyasının sədri Ağasif Şakiroğlunun Bakı şəhərində apardığı kiçik bir monitorinqin nəticələrini olduğu kimi təqdim edir:

“Bakı şəhərində apardığım monitoring məni dəhşətə gətirdi. Küçələr qumar meydanını xatırladır…

Təkcə “28 may” metrostansiyasının çıxışında və ətrafında, Azərbaycan Dövlət Neft və Sənaye Universitetinin yaxınlığında 17 ədəd “Poz,qazan” ani lotereyasının pərakəndə satış məntəqələrini gördüm. Hər birinin də ətrafında 15-20 nəfər toplaşaraq həyatlarını dəyişəcəyinə, bir günün içində ev, maşın, pul sahibi olacağına ümid edir, qazanan isə, əlbəttə ki, “Azərlotoreya”dır! İnsanların cibinə ümid və saf duyğularından istifadə edərək girilir.

Məni dəhşətə gətirən insanların sadəlövhlüyü, səmimiyyəti deyil, satış məntəqələrinin ətrafında toplaşan insanlar arasında yeniyetmələrin çoxluq təşkil etməsi oldu. Təsəvvür edin, “piştaxta”ların sahibləri üçün lotoreyanın kimə satılması önəmli deyil, önəmli olan lotoreyaların satılmasıdır…

Başa düşməyə çətinlik çəkdiyim məsələlərdən biri də küçə ticarətinə “göz yumulması”dır. Başqa vaxt alma-armud, tum və sair kimi xırda ticarətlə məşğul olan, ailələrinə çətinliklə pul aparmaq istəyən şəxslərə mane olan, cərimə yazan və digər qanuni tədbir görən dövlət qurumlarının bu mənzərəyə seyrçi qalmasıdır. Bu dəhşətlərə “dur” demək bu qədərmi çətindir?

Doğrudur, “Azərlotoreya”nın fəaliyyəti leqaldır. Amma hər bir işin həddi-hüdudu və qaydaları var axı. Leqaldır deyə hərə bir “taxta oturacaq düzəldərək insanları qumara sövqmü etməlidir? Metroların giriş və çıxışlarında, insanlar çox olan yerlərdə “Azərlotoreya”nın əməkdaşları hərəsi bir stol qoyaraq satışmı etməlidir? Bunu sivil qaydada təşkil etmək mümkün deyilmi? Olmazmı ki, bu günə qədər olduğu kimi köşklərdə satılsın. Mütləqdirmi gənc nəslin, yeniyetmələrin tərbiyəsinin pozulması üzərində belə iş təşkil edilsin?

Hesab edirəm ki, nə qədər gec deyil, bu biabırçılığın qarşısı mütləq alınmalıdır…”

Bir cavab yazın

Sizin e-poçt ünvanınız dərc edilməyəcəkdir.

*

*

*