“Evli kişi ilə münasibət quran qadınların davranışlarının arxasında müxtəlif psixoloji faktorlar dayanır. Psixoloji analiz bu halların hər birində fərdi yanaşma tələb edir. İlk səbəb kimi özünüqiymətləndirmə və sevgi ehtiyacı göstərilir. Özünü aşağı qiymətləndirən qadınlar tez-tez ətrafdan təsdiq gözləyir və bu səbəbdən qarşılarındakı şəxsin evli olub-olmamasına diqqət yetirmirlər”.

Bu fikirləri psixoloq, psixoterapevt Sibel Piriyeva KONKRET.az-a açıqlamasında səsləndirib:

“İkinci səbəb isə qadağan olunmuş maraq və həyəcan axtarışı ilə bağlıdır. Bu, daha çox şəxsiyyət pozuntusu olan insanlarda müşahidə edilir. Belə qadınlar adrenalin və gizli ehtiras axtarışında olduqları üçün təhlükəli münasibətlərə meyil göstərirlər.

Bəzən bu cür münasibətlər reallıqdan qaçmaq və illüziya yaratmaq məqsədi daşıyır. Evli kişidən gələn diqqət və romantik davranışlar qadın tərəfindən “sevgi” kimi qəbul edilir. Əgər qadın uşaqlıq dövründə ata sevgisindən məhrum olubsa, bu boşluğu yetkin yaşda yaşca böyük kişilərlə münasibətdə doldurmağa çalışa bilər.

Uşaqlıq travmaları arasında tərk edilmək qorxusu da xüsusi yer tutur. Bəzi ailələrdə uşaqlar cəzalandırılarkən “səni uşaq evinə verəcəyik” kimi cümlələr işlədilir ki, bu da onların şüuraltında tərk edilmə qorxusu formalaşdırır. Bu qorxu yetkinlik dövründə toksik münasibətlərdən uzaqlaşmağı çətinləşdirə bilər.

Bəzi hallarda evli kişi ilə münasibətə girən qadınlar bu əlaqəni emosional deyil, maddi dəstək səbəbilə qururlar. Digər bir motivasiya isə stabillik illüziyası ilə bağlıdır. Evli kişilərin həyat tərzi işə gedib gəlmələri, dostları ilə az vaxt keçirmələri qadınlarda etibarlı obraz yarada bilər”.

Psixoloq Gülnar Orucova isə saytımıza açıqlamasında bildirib ki, ümumiyyətlə, bir qadın evli kişiyə maraq göstərirsə, bu, çox zaman onun emosional ehtiyaclarının qarşılanmaması ilə əlaqələndirilir.

“Bu hal qadının emosional yetkinliyə çatmadığını və dərin psixoloji travmalar yaşadığını göstərə bilər. Bəzi qadınlar xüsusilə özlərindən yaşca böyük, eyni zamanda evli kişilərə meyilli olurlar. Bu cür qadınlarda özgüvən və özünü dəyərləndirmə hissi adətən aşağı olur.

Evli kişilər isə çox zaman oxşar ifadələrlə qadınları təsir altına almağa çalışırlar: “Yoldaşımla münasibətim pisdir”, “Anamın təkidi ilə evlənmişik”, “Artıq ayrı-ayrılıqda yaşayırıq”, “Boşanmaq istəyirəm, amma uşaq var” və sair. Qadın bu sözləri eşitdikdə, ailəsində və ya əvvəlki münasibətlərində görmədiyi sevgi, diqqət və qayğını həmin kişidə tapmağa çalışır.

Subay bir qadının evli bir kişi ilə münasibətə başlamasından sonra bu əlaqənin verdiyi zərərin daha aydın göründüyü hallarla qarşılaşırıq. Sosial şəbəkələrdə aktiv və tanınmış kişilərə maraq da bəzən bu psixoloji fon üzərindən formalaşır. Hətta o kişi daha əvvəl bir neçə dəfə münasibət qurub ayrılmış, evli və ya övlad sahibi olsa belə, bəzi qadınlar bu gerçəkləri bilə-bilə onlarla münasibət qurmağa can atırlar. Bu münasibətlərin arxasında bəzən maddi maraqlar da dayanır.

Özünə dəyər verən, özünü sevən və yüksək özgüvənə sahib bir qadın heç vaxt “ikinci” olmağı qəbul etmir. O, həmişə həyatında “birinci” olmağı seçir. Çünki bilir ki, ikinci olmaq həm özünü, həm də gələcəyini inkar etməkdir.

Bəzi insanlar ailələrində dəyər görmədikləri üçün hər zaman əlçatmaz olanın arxasınca gedirlər. Onlar asanı deyil, çətin olanı seçirlər. Mübahisəli və mürəkkəb münasibətlər onlara daha cazibədar gəlir. Hətta bəzi hallarda evli bir kişini sevib onu ailəsindən ayırmağı özləri üçün uğur sayan qadınlar da olur. Bu isə onların keçmişdə xüsusilə uşaqlıqda təsdiqlənmə ehtiyacının qarşılanmaması ilə əlaqədardır. Onlar sanki “Mən bunu bacardım” deməklə özlərini təsdiqləməyə çalışırlar.

Amma hər halda, evli bir kişi ilə münasibət qadının psixoloji sağlamlığı üçün zərbədir. Çünki o kişi axırda yenə evinə, ailəsinə qayıdır. Qadın isə tək qalır, tənhalıq hiss edir. Bu tənhalıq darıxmaq duyğusu ilə qarışaraq əlaqəyə asılılıq və bağlılıq forması qazandırır. Lakin kişi bir qadında asılılıq və ehtiyac hiss etdikdə, onu tərk etməyə meylli olur. Kişilər adətən elə qadınlara maraq göstərirlər ki, onları itirməkdən qorxsunlar”.

Psixoloq Samirə Bağırovanın da fikirlərini öyrəndik. O, vurğuladı ki, bu məsələnin şüuraltı bir neçə səbəbi var.

“Onlardan biri, “seçilmiş və ya əlçatmaz kişi” obrazının cazibədar görünməsidir. Evli kişi artıq “seçilib”, yəni bir qadının etibarını qazanıb. Bu isə bəzi qadınlarda onun etibarlı və ciddi biri olduğu təəssüratını yaradır. Hətta uşağını gəzdirən və qayğıkeş bir ata obrazı da qadınlar üçün cazibədar ola bilər.

Digər səbəb isə insan psixologiyasında “olmaz”ın daha cəlbedici görünməsidir. Qadağan olunan şeylərin insanı daha çox cəlb etməsi bu davranışın əsas izahlarından biridir. Emosional, fiziki və ya duyğusal boşluq yaşayan qadın isə bu boşluğu doldurmaq ehtiyacı hiss edə bilər.

Ən geniş yayılmış və problemli səbəblərdən biri də bəzi qadınların başqa bir qadına “qalib gəlmək” istəyi ilə hərəkət etməsidir. Bu, özünə dəyər hissini sübut etmə cəhdinə çevrilə bilər. Lakin nəticədə ən çox əziyyət çəkən elə həmin qadın olur.

Sadə və eyni zamanda geniş yayılmış başqa bir səbəb isə bəzi evli kişilərin flirt etməyə meyilli olmasıdır. Onların bu davranışları qarşı tərəf tərəfindən bəzən romantik siqnallar kimi qəbul edilir.

Nəticə etibarilə, hər bir insanın seçimində şəxsi səbəblər, psixoloji vəziyyət və həyat tərzi mühüm rol oynayır”.

Aynurə İsmayıl
KONKRET.az