Şamaxı rayonunda məmur özbaşınalığı pik həddə çatıb. Bununla bağlı redaksiyamıza ilginc məlumatlar daxil olub.

KONKRET.az-ın Araşdırma Qrupu bu məlumatları yerində dəqiqləşdirmək və şikayətçilərlə görüşmək üçün Şamaxıya ezam olunub. Rayonda əldə etdiyimiz informasiyalar, müraciət və şikayətlər bir yazıya sığan deyil. Odur ki, materiallar silsilə şəkildə tirajlanacaq. Həmin materialların əksər hissəsi birbaşa Şamaxı Rayon İcra Hakimiyyəti ilə bağlıdır. İcra hakimi Tahir Məmmədov başda olmaqla ona tabe olan məmurların fəaliyyəti ilə bağlı detallı məlumatlar deməyə əsas verir ki, ölkənin hüquq-mühafizə orqanları, Hesablama Palatası, Maliyyə Nazirliyi və digər müvafiq dövlət qurumları hərəkətə keçməli, qeyd olunan məlumatların səhihliyi dəqiqləşdirilməli, günahkarlar müəyyən edilərək ciddi cəzalandırılmalıdır.

Əldə olunan məlumatlardan biri Şamaxı Rayon İcra Hakimiyyətinin ərazi və yerli özünüidarəetmə şöbəsinin müdiri Mərdan Nəhmətovla bağlıdır. İddialara görə, adıçəkilən məmur rayonda əsas söz sahiblərindən biridir. İcra başçısının sağ əli olmaqla rayonda tikinti işlərinə, icra nümayəndələri və kənd bələdiyyə sədrlərinin təyinatına birbaşa nəzarət edir.

Redaksiyamıza daxil olan məlumatlarda vəzifə sahiblərinin adları və tutduqları vəzifəyə görə verdikləri rüşvətin siyahısı təqdim edilib.

Həmin siyahını təqdim edirik:

O da bildirilir ki, hər bir icra nümayəndəsinə şöbə müdiri tərəfindən motorola telefonları paylanıb və aylıq onlardan 20 manat pul toplanır. Maraqlıdır, görəsən, yerli məmurlara ayrı-ayrılıqda belə telefonların paylanması nəyə xidmət edir?

Uzun illər saxta diplomla Qobustan rayon hərbi komissarı işlədiyi iddia edilən Mərdan Nəhmətov, görünür, kimlər üçünsə əsl “fərasət dağarcığıdır”. Ona görə də Mərdan müəllimi rayonda “daşdan da pul çıxarır” deyib hər işdə “irəli verirlər”.

“Daş” dedim yadıma Nəhmətovların ailə məzarlığı düşdü. Deyilənə görə, şöbə müdiri rayonun təmiri zamanı alınan və ya sökülən daş üzlükləri doğmalarının qəbir daşlarına vurdurmağa cəhd edib, amma qarşısı qismən də olsa, alınıb. Bu da əlahəzrət faktlar.

Qeyd edildiyi kimi, torpaq və tikinti icazələrinə birbaşa Nəhmətov özü nəzarət edir. Şamaxıda bir sıra bahalı yerlərdə torpaq və villalara, obyektlərə sahib olduğu barədə konkret fotoşəkillər və sənədlər var. Bu adam o qədər harınlayıb ki, Heydər Əliyev prospektindəki evinin yanında obyektlər tikməklə yolu qanunsuz olaraq tamamilə bağlayıb. Adam insanların gözünün odunu elə alıb ki, hətta şəhərin mərkəzindəki villasının yanından belə rahat hərəkət etmək iqtidarında deyillər. Evinin qabaq tərəfində yolun üstündə tikdirdiyi kafe, market, moyka, dönərxana sakinlərin hərəkətini çətinləşdirib. Daha doğrusu, Nəhmətov özü hərəkəti məhdudlaşdırmaq üçün qadağa qoyub, üstəlik, yolun ortasına bir boru da basdırıb.

Sakinlər bildirirlər ki, dəfələrlə şikayət etmələrinə baxmayaraq, bununla bağlı heç bir tədbir görülmür.

Şamaxıda məmur özbaşınalığı o həddədir ki, Mərdan Nəhmətov kənd təsərrüfatı təyinatlı torpaq sahəsində özünə villa da tikdirib. Görünən odur ki, şöbə müdirinin iştahı ona o qədər güc gəlib ki, dövlət başçısının fikirlərinə belə önəm vermək haqqında heç nə düşünə bilmir. Xatırladaq ki, Prezident İlham Əliyev öz çıxışlarında dəfələrlə məmurlara bildirib ki, “Ətraf mühitə böyük ziyan vurulur, qanunsuz işlər görülür, torpaqlar zəbt edilir, ağaclar kəsilir, yerində evlər tikilir, kənd təsərrüfatı təyinatlı torpaqlarda aidiyyəti olmayan obyektlər inşa edilir. Özbaşına heç kim heç bir iş görə bilməz. Qaydalar nədir, qanunlar nədir, hər kəs ona əməl etməlidir. Torpaqların zəbt edilməsi, meşə fondunun məhv edilməsi və digər xoşagəlməz hallar olmamalıdır. Yəni bu hallara dözümlülük sıfır dərəcəsində olmalıdır”.

Kənd təsərrüfatı təyinatlı torpaq sahəsində Nəhmətova məxsus ev

Keçmiş “voyenkom” rayonda “unikal idarəetməsi” və hegemonluğu ilə ad çıxarıb. Deyilənə görə, qəbuluna gələn vətəndaşların əksəriyyətini təhqir etməklə insident yaradır və qadın-kişi bilmədən onlardan özü polisə şikayət edir.

Şamaxı rayon Quşçu kənd sakini Alişan Zülfüqarovun dediklərindən:

“Oğlum, İkinci Qarabağ müharibəsi veteranı Zülfüqarov Seymur Alişan oğlu analığı ilə birlikdə dəfələrlə rayon icra hakimiyyətində olub, müvafiq işlə təmin olunmaqları barədə müraciət ediblər. Lakin bizə oradan dəfələrlə eşitdirirdilər ki, pul verməsən, mümkün deyil.  Son anda oğlum hərbiyə qayıtdı və MAXE kimi xidmətini davam etdirir. Dəfələrlə icra başçısı Tahir Məmmədovun qəbulunda da olmuşam. Bu yaxınlarda Mərdan Nəhmətov yoldaşımı qəbul edib, iki azyaşlı uşağının yanında nalayiq sözlərlə təhqir edib. Ona görə belə edir ki, bir də icra hakimiyyətinə şikayətə gəlməsin. Bir akt da yazdırıb ki, guya xanımım orada kimləri isə təhqir edib, hökumətimizi söyüb. Həmin aktı da göndərib polis idarəsinə. İcra hakimiyyətində digər işçilər də akta utanmazcasına qol çəkiblər.

Mən də yoldaşımı götürüb getdim Vüsal adlı təhqiqatçının yanına. Mənə dedi ki, yoldaşın xuliqanlıq edib. Soruşdum ki, bunun 3 azyaşlı uşağı var, görün, xuliqana oxşayır?

Polis idarəsindən dedilər ki, bəs qadın 70 manat cərimə edilməlidir. Dedim, həyat yoldaşım puldan, işdən ötrü gedib də qəbula. Bunun pulu hardandır? Yenə sağ olsunlar polislər, məsələni yoluna qoydular. Amma görünən odur ki, icra hakimiyyəti məmurlarının məqsədi bizi dövlətdən narazı salmaqdır. Hələ qəbula gələn başqa xanımları da 102-yə zəng etməklə qorxudur. Vətəndaş məmnunluğu budurmu? Bəs icra başçısı Tahir Məmmədov hara baxır? Cənab Prezidentdən xahiş edirik, bu özbaşınalıqlara son qoyulsun”.

Qeyd edək ki, bir neçə gün bundan öncə politoloq Cümşüd Nuriyev də “Reaksiya” TV-də bölgədəki vəziyyətlə bağlı sensasion açıqlama ilə çıxış edib. Həmin çıxışı olduğu kimi təqdim edirik:

“Azərbaycan hakimiyyəti daxilində öz mövqeyini və yığdığı pulları qorumaqdan ötrü çox güclü müxalifət formalaşdırılır. 5-ci kolon timsalında həm Rusiya, həm də İran tərəfindən. Mən bir araşdırmanın nəticəsini deyəcəm. Son günlərdə İran Çin taktikasını seçib, yəni “ilanı Seyid Əhməd əli ilə tutmaq”. Hal-hazırda İran molla sistemindən imtina edib. Qeyd edək ki, əvvəl bunlar “bozbaş mollalar”la təbliğata keçmişdilər. Amma indi bir az ağıllanıblar, başqa taktika seçiblər. İran Azərbaycanda vəsait ayrılan yerlərdə öz adamlarını yerləşdirir. Məndə konkret faktlar da var. Bu, Qarabağı çıxmaq şərtilə ən çox infrastrukturun formalaşdığı yerlərdir. Əsasən turizmin inkişafı ilə bağlı vəsait ayrılan bölgələrdə fəaliyyətə başlayıblar. Mən qısaca Şirvanda apardığım tədqiqatın nəticəsini deyə bilərəm: Şamaxı, Ağsu, Qobustan, İsmayıllı və Kürdəmir. Bu beş rayonda bütün infrastruktur bir adamın əlində cəmləşib.

Birmənalı şəkildə icra başçılarının elə özləri ondan qorxur. Çünki həmin icra başçıları üçün Bakıda ofislər, bahalı mülklər alınıb. Həmin icra başçıları bölgələrdə şəhid və qazi ailələrinə bir növ soyuq münasibətə başlayıblar. 8 Martda şəhid ailələrini qəbul edən icra başçılarının əksəriyyəti bu il nə bir şəhid anasını qəbul edib, nə də bayramını təbrik edib. Amma əvvəl bu ənənə olub. Novruz bayramında nə şəhid, nə də qazi ailələri icra başçıları tərəfindən ziyarət olunmayıb. Niyə görə? Çünki bunların arxasında İranın, Ocaq Necatın Azərbaycanda yerləşdirdiyi və ayrı-ayrı nazirliklərdə işləyən çox yüksək vəzifəli adamlar durur. Onlar hətta icra başçılarından gələn şikayətlərin qarşısını çox ustalıqla alırlar. Bu rayonda bütün infrastruktur layihələrinə rəhbərlik edən həmin adam bir rayona ayrılan 33 milyon pulu mənimsəyib və icra başçısına Bakıda 3 milyona bahalı ev alıb”.

(Ardı var)

KONKRET.az-ın ARAŞDIRMA QRUPU

P.S. Məsələ ilə bağlı icra hakimiyyətinə göndərdiyimiz sorğuya və dəfələrlə etdiyimiz zənglərə cavab verilmədi. Bütün hallarda qarşı tərəfin də mövqeyini işıqlandırmağa hazırıq.