Azərbaycanda regionların sosial-iqtisadi inkişafı ilə bağlı görülən işlər göz qabağındadır. Amma “gözdən uzaq, könüldən iraq” olan bir ərazi vahidi də var ki, uzun illərdir infrastruktur üzünə həsrət qalıb. Hərçənd qonşuluğunda yerləşən, ölkənin ikinci ən böyük şəhəri olan Sumqayıtla həmyaşıd sayıla bilər. Ancaq Sumqayıtdan fərqli olaraq bu qəsəbənin nə yolu, nə suyu, qazı və işığı, nə kanalizasiya sistemi, nə də həyat üçün vacib olan digər infrastrukturu normal vəziyyətdədir. Azacıq yağış yağan kimi elektrik xətləri qırılır, kanalizasiya sistemi işləmədiyi üçün yolları su basır, qazın təzyiqi azalır və beləcə sözün əsl mənasında burada yaşayan vətəndaşların “cəhənnəm əzabı” başlayır. Söhbət Abşeronun Saray qəsəbəsindən gedir. O Saray ki, tarixi IX əsrlərə qədər gedib çıxır. Belə ki, hələ eramızdan əvvəl Böyük İpək yolunun bir hissəsi köhnə Saray kəndi adlanan ərazidən keçib. Amma müasir Sarayın sarayları xatırladacaq normal infrastrukturu olmadığından əhali hər baxımdan əziyyət çəkir.
Qəsəbənin abadlığına cavabdehlik daşıyan Abşeron Rayon İcra Hakimiyyətinin laqeydlik sindromuna isə Saray qəsəbəsinin icra nümayəndəsindən tutmuş, bələdiyyə sədrinə qədər bütün xırda məmurları yoluxub. Elə bunun nəticəsidir ki, xırda su borusu partlayanda belə, bələdiyyə sədri zəhmət çəkib öz kreslosundan qalxmaq və əraziyə baxış keçirmək istəmir. Əvəzində isə sədr vəzifəsini icra edən Şahlar Məhərrəmov yaxşı “pul yığmaq” bacarığına malikdir. Belə ki, sədr əvəzi torpağın hər sotuna görə 60, evin kvadratına görə isə 30 qəpik vergi yığır. Bu məbləğ ilk baxışdan az görünə bilər. Ancaq 19 min əhalinin yaşadığı qəsəbədə hər evə və torpağa görə yığılan vergi il ərzində yüz minlərlə vəsait edir. Bu vəsaitin kimlərin cibinə getdiyini demək çətindir. Amma yığılan pulların Saray qəsəbəsinin abadlığına xərclənmədiyini əminliklə söyləmək mümkündür. Bir də axı “görünən dağa nə bələdçi”, hər şey göz qabağındadır.
Bu arada qəsəbə sakinlərinin bələdiyyə sədri sarıdan bəxti heç vaxt gətirməyib. Hələ 2016-cı ildə Saray qəsəbə bələdiyyəsinin sədri Vəsilə Əbilhəsənova və onun həyat yoldaşı Vəfadar Əbilhəsənov öz evində qətlə yetirilib. Həmin vaxt yerli mediada dərc edilən məlumatlara görə, mərhum bələdiyyə sədrinin adı torpaq alverində və qeyri-qanuni sənədləşmə işlərində hallanırdı. Bir müddət öncə isə adı korrupsiya qalmaqalında hallanan bələdiyyə sədri Məhi Həsənov Baş Prokuror yanında Korrupsiyaya qarşı Mübarizə Baş İdarəsinin əməkdaşları tərəfindən keçirilən əməliyyat zamanı saxlanılmışdı. Görünür, sədr əvəzi vəzifəsini icra edən Şahlar Məhərrəmov da öz sələflərindən geri qalmaq fikrində deyil və inadla onların yolunu davam etdirir. Başı torpaq satmağa və pul yığmağa qarışan bələdiyyə sədri qəsəbənin ən xırda problemləri ilə maraqlanmır, sakinlərin şikayətlərini dinləmir və daha yüksək qurumlar qarşısında Sarayın inkişafı üçün heç bir məsələ qaldırmır. Belə davam edərsə, çox güman ki, Şahlar Məhərrəmov da özündən əvvəlki sədr Məhi Həsənovun aqibətini yaşayacaq.
Qeyd edək ki, bir müddət öncə tanınmış jurnalist Sevinc Paşayeva Abşeron rayon Saray qəsəbəsinin mərkəzi küçələrindən birində su borusunun partlaması haqda məlumat paylaşıb. Qeyd edib ki, hadisə nəticəsində küçəni su basaraq, onsuz da bərbad olan yolları daha da iflic edib. Jurnalist məsələ ilə bağlı dəfələrlə Saray bələdiyyəsinə məlumat versə də, sədr əvəzi Şahlar Məhərrəmov problemin aradan qaldırılması istiqamətində heç bir addım atmayıb. Yumşaq desək, qəsəbəni ağzına alan su sədrin tükünü belə tərpətməyib. Əvəzində isə Məhərrəmovun iclaslarda olduğu bildirilib. Qısacası, sədr əvəzi yumşaq kreslosundan “yumşaq yerini” qaldırmağa lüzum görməyib. Nəticədə məsələ ilə bağlı “Azərsu” ASC ilə əlaqə saxlanılıb və problem haqqında məlumat verilib. İnsafən demək lazımdır ki, “Azərsu” əməkdaşları şikayətə reaksiya verərək problemlə yerindəcə tanış olublar və hətta borunun təmir ediləcəyinə söz veriblər. Amma müəyyən vaxt keçməsinə baxmayaraq, boru təmir edilməyib və su hələ də Sarayın küçələrinə axır.
Su boş-boşuna küçələrə axdıqca isə nə baş verir? Sözsüz ki, dövlət hərtərəfli itirir. Həm sərvətini, həm malını, həm də elə vətəndaşın ona qarşı inamını. Bütün bunlara rəvac verənlər isə Şahlar Məhərrəmov kimi məmurlardır ki, onların da cəzasını gec-tez dövlət özü verəcək!
Müşviq Tofiqoğlu,
KONKRET.az