Bəşər və Mahir Əsədin, eləcə də bir neçə suriyalı hərbi liderin Rusiyanı tərk etmək üçün müraciət ünvanlaması birmənalı qarşılanmayıb və müəyyən suallar doğurub. Görəsən Rusiyaya sığınan Əsəd niyə oradan çıxmaq istəyir?
Mövzu ilə bağlı politoloq Əziz Əlibəyli KONKRET.az-a açıqlama verib.
Əlibəylinin sözlərinə görə, bu, Rusiyanın siyasətinin nəticəsidir:
“Rusiyanın Suriya üzrə nümayəndəsi Boqdanovun yenidən təyin edilməsi göstərdi ki, Moskvanın Yaxın Şərqə yanaşması unikal və fərqlidir. Rusiya prinsipcə öz maraqlarının təhlükə altında olduğunu düşünmür. Ukrayna müharibəsi səbəbindən Rusiya Yaxın Şərqdə yeni savaşa başlamaq niyyətində deyil. Lakin yeni müharibəyə cəlb olunma ehtimalı mövcuddur.”
Politoloq qeyd edib ki, yaxın vaxtlarda Ukrayna cəbhəsində hərbi dəyişiklik olacağı təqdirdə, Rusiya dərhal Yaxın Şərqdə də yeni addımlar ata bilər:
“Suriyada bir neçə gün əvvəl başlayan daxili qarşıdurmalar, İsrailin hava zərbələri və oradakı şiələrin ayaqlanması ciddi problemlərin mövcudluğunu göstərir. Belə ehtimallar fonunda İran və Rusiyanın müəyyən hazırlıq içində olduğunu söyləmək mümkündür.”
Əziz Əlibəyli əlavə edib ki, məhz bu səbəbdən Bəşər Əsədin yenidən siyasi səhnəyə qayıtması üçün zəmin hazırlanır.
Müşviq Tofiqoğlu
KONKRET.az