Səudiyyə Ərəbistanı Suriya ilə ölkənin müharibədən dağılmış infrastrukturunun, telekommunikasiya və digər mühüm sektorlarının bərpasına kömək etmək üçün 6,4 milyard dollar dəyərində böyük investisiya və tərəfdaşlıq sazişləri imzalayıb. Suriyanın yenidən qurulması ideyadan reallığa çevrilir və milyardlarla dolların iyi hiss edilməyə başlayır. Bu qoxu o qədər güclüdür ki, indi böyük xarici şirkətlər arasında bu məsələ üçün ayrılan vəsaitə kimin çıxışına icazə veriləcəyi müəyyən həyəcan yaradır.

KONKRET.az xəbər verir ki, liderlər arasında amerikalılar, türklər, qətərlilər və səudiyyəlilər var. Ona görə də hazırda onların qarşısında duran ən mühüm vəzifə ətrafdakı hər kəsi inandırmaqdır ki, əl-Şaara Dəməşqdə möhkəm oturub, Suriyada vəziyyət nəzarət altındadır və orada beynəlxalq sərmayə üçün heç bir təhlükə yoxdur.

Ötən gün prezident Donald Trampın Suriya üzrə xüsusi nümayəndəsi Tom Barak bəyan edib ki, “suriya qoşunları” Əs-Suveydaya daxil olmayıb və buna görə də druzlara qarşı vəhşiliklərə qatılmayıb. Onun fikrincə, qətliamlarda İŞİD yaraqlıları iştirak edə bilər.

Barak həmçinin qeyd edib ki, sosial şəbəkələrdəki görüntülər sübut kimi etibarsızdır və asanlıqla saxtalaşdırılır. Başqa sözlə desək, druzların və ondan əvvəlki ələvilərin qırğınlarında Dəməşqin heç bir günahı olmayıb.

Səudiyyə Ərəbistanının sərmayələr naziri Xalid əl-Falih Dəməşqdə keçirilən toplantıda bildirib ki, infrastruktur və üç sement zavodunun tikintisinə 11 milyard rial – təxminən 2,9 milyard dollar xərclənəcək. Səudiyyə telekommunikasiya şirkətləri daha bir milyard dollar sərmayə qoyacaq.

Amerika, Türkiyə və Qətər sərmayələrinin dəqiq və hətta təxmini məbləği hələlik məlum deyil, lakin əminliklə onun Səudiyyə ilə kifayət qədər müqayisə oluna biləcəyini güman etmək olar. Onu da başa düşmək lazımdır ki, bu milyardlar birbaşa əl-Şaara hökumətinə getməyəcək. Nəticədə suriyalılar öz iqtisadi suverenliklərinin bir hissəsini unutmalı olacaqlar.

Müşviq Tofiqoğlu

KONKRET.az