Kanadanın baş naziri Castin Trüdo (Justin Trudeau), federal satış vergisinə müvəqqəti güzəşt və 18 milyondan çox Kanada vətəndaşına birdəfəlik 250 dollarlıq ödənişi ehtiva edən 6,3 milyard Kanada dolları (4,5 milyard ABŞ dolları) dəyərində iqtisadi paket elan edib.  

KONKRET.az “Bloomberg”ə istinadən xəbər verir ki, bu plan, ilin əvvəlində Trüdo hökuməti ilə hakimiyyəti bölüşmək barədə razılaşmadan geri çəkilən müxalifət “Yeni Demokratlar Partiyası”nın dəstəyini qazanıb. Vergi və ödəniş paketinə dair razılaşma, hökumətin parlamentdəki mövqeyini gücləndirərək erkən seçki ehtimalını azaldır.

Tədbirlər həmçinin mühafizəkar partiya rəqiblərindən çox geri qalan Trüdonun “Liberal Partiyası”na ictimai dəstəyi bərpa etməyi hədəfləyir.

İctimai rəy sorğuları, yaşayış xərcləri ilə bağlı narahatlıqların və mənzil qiymətlərinin baş nazirin populyarlığını azaltdığını göstərir.

Trüdo bildirib: “Hökumətimiz qiymətləri müəyyənləşdirə bilməz, amma Kanada vətəndaşlarının, xüsusilə də işləyən vətəndaşların ciblərinə daha çox pul qoya bilərik.”

Hökumət 14 dekabrdan 15 fevrala qədər müxtəlif məhsullar üçün tətbiq edilən federal mal və xidmət vergisini ləğv edəcəyini elan edib. Bu güzəştə paket yeməklər, restoran xərcləri, qəlyanaltılar, alkoqol, uşaq geyimləri və oyuncaqları, kitablar, qəzetlər, tapmacalar və Milad ağacları daxil ediləcək.

Paket federal büdcəyə təsir göstərə biləcək suallar yaradır. Kanadanın büdcə müşahidəçisi, Trüdo hökumətinin öz maliyyə limitlərini aşdığı barədə xəbərdarlıq edib. Parlament Büdcə Rəsmisi İv Giuro (Yves Giroux), federal hökumətin 2023-24-cü maliyyə ilində 46,8 milyard Kanada dolları (33,5 milyard ABŞ dolları) büdcə kəsiri ilə üzləşəcəyini proqnozlaşdırır.

Maliyyə naziri Kristia Frilend (Chrystia Freeland) aprel büdcəsində 40 milyard Kanada dolları kəsir gözləmişdi. Hökumət hələ keçən maliyyə ili üçün dəqiq rəqəmləri açıqlamayıb. /Valyuta.az