ABŞ Hindistanın məbədlərindən oğurlanmış 307 incəsənət əsərini geri qaytarıb.

KONKRET.az xəbər verir ki, bu barədə “The Times of India” nəşri məlumat yayıb.

Bildirilib ki, geri qaytarılan əsərlərin təhvil-təslim mərasimi Hindistanın Nyu-Yorkdakı Baş Konsulluğunda baş tutub.

“Biz Hindistana yüzlərlə sənət əsərini qaytardığımız üçün qürur duyuruq. Oğurlanmış bu artefaktların qaytarılması ABŞ və Hindistanın hüquq-mühafizə orqanlarının əməkdaşlığı sayəsində mümkün olub”, – Manhetten prokuroru bildirib.

Məlumata görə, onların ümumi dəyəri 4 milyon dollardır. Ən qiymətlisi 12-13-cü əsrlərə aid 85 min dollar dəyərindəki hindu tanrısı Parikaranın mərmər heykəlciyidir.

İstintaq zamanı Asiya ölkələrindən oğurlanmış 143 milyon dollar dəyərindəki 2,5 min incəsənət əsəri müsadirə edilib.

Qeyd edək ki, 2021-ci ilin oktyabrında ABŞ Hindistandan oğurlanmış 15 milyon dollar dəyərində 250 sənət əsərini geri qaytarıb.

İqbal Rzayev,

KONKRET.az