İçki içən insanın sinir hüceyrələri ağır sınaqlara məruz qalır ki, bu da onların vaxtından əvvəl aşınmasına və dağılmasına səbəb olur.

Bəzi insanlar orta miqdarda spirt içməyin nəinki zərərli, həm də faydalı olduğuna dair yanlış təsəvvürə sahibdirlər. Bir çoxları alkoqolun iş qabiliyyətini artırdığına, yaradıcı fəaliyyətə kömək etdiyinə, iştahanı yaxşılaşdırdığına, mədə xorası, soyuqdəymə və digər xəstəliklərdən qoruduğuna əmindirlər. Bu fikirlər kökündən səhvdir. Müntəzəm alkoqol istifadəsi bütün orqanlara və sistemlərə, xüsusən də xəstəliyə meyilli olanlara zərər vurur.

Alkoqolu çox vaxt stimullaşdırıcı vasitə adlandırırlar. Bu, doğru deyil. Axı spirt spesifik zəhərdən başqa bir şey deyil və o, stimullaşdırıcı vasitə də deyil, əksinə, mərkəzi sinir sisteminə depresif təsir göstərir. Alkoqolun beyinə təsirinin onun qandakı konsentrasiyasından birbaşa asılı olduğu sübut edilib. İstifadəyə başlayarkən əvvəlcə beyində böyük yarımkürələrin qabığının strukturları əziyyət çəkir; davranışa nəzarət edən beyin mərkəzlərinin fəaliyyəti boğulur; hərəkətlərə ağlabatan nəzarət itirilir və özünə qarşı tənqidi münasibət azalır. Qanda spirtin konsentrasiyası artdıqca, beyin qabığında “əyləc” proseslərinin daha da sıxılması baş verir. Onun mərkəzləri xaotik həyəcan içərisinə düşürlər, nəticədə aşağı davranış formalarının və instinktlərin azad olması ilə müşayiət olunur.

Çoxsaylı təcrübə və müşahidələr göstərib ki, güclü alkoqollu içkilərin hətta birdəfəlik qəbulu müvəqqəti olsa da, beyinin bütün hissələrində ciddi pozuntulara səbəb olur. Alkoqol diplopiyası (görmənin ikiləşməsi) hamıya məlum bir hadisədir. Alkoqolun zəhərli təsiri nəticəsində beyinin gözü hərəkət etdirən mərkəzində “əyləclər” işə düşür. Göz əzələləri daha yavaş yığılır, onların əlaqələndirilmiş işi pozulur. Görmə oxları bir-birinə nisbətən sürüşür və təsvir torlu qişanın asimmetrik hissələrinə düşür – insan hər şeyi cüt görməyə başlayır.

Alkoqol eşitməyə də mənfi təsir göstərir, dad hissi pozulur, xarici təsirlərə reaksiyalar zəifləyir, sadə riyazi məsələlərin həllində səhvlərin sayı artır.

Alkoqol beyinin damarlarına mənfi təsir göstərir. Zəhərlənmənin başlanğıcında onlar genişlənir, onlarda qan axını yavaşlayır və bu da beyində durğunluğa səbəb olur. Sonra alkoqoldan əlavə, onun natamam çürüməsinin zərərli məhsulları qanda yığılmağa başladıqda, kəskin bir spazm və qan damarlarının daralması baş verir. Məhz buna görə sərxoş vəziyyətdə tez-tez (və xüsusən də yaşlı insanlarda) beyinə qansızmaları, insult kimi təhlükəli fəsadlar inkişaf edir, ağır əlilliyə və hətta ölümə səbəb olur.

İçki içən insanın sinir hüceyrələri ağır sınaqlara məruz qalır ki, bu da onların vaxtından əvvəl aşınmasına və dağılmasına səbəb olur. Əgər insan artıq içkidən imtina edə bilmirsə, dayana bilmirsə, onda normadan kənar üzvi və deməli kənarlaşmalar həndəsi silsilə ilə artmaqdadır. Təcrübə göstərir ki, alkoqoldan sui-istifadə bir çox ruhi xəstəliklərin mənbəyi və ilkin səbəbidir.

Statistika göstərir ki, alkoqoldan sui-istifadə edən insanlarda qaraciyərin sirozunun baş verməsi içki içməyənlərə nisbətən yeddi dəfə daha çox müşahidə olunur. Karbohidrat mübadiləsi də pozulur, nəticədə qanda şəkərin səviyyəsi yüksəlir, qaraciyərdə glikogenin yaranması azalır, karbohidratların orqanizmin toxumaları tərəfindən sorulması da çətinləşir.

Bütün bu faktlar bizi apardığımız həyat tərzi haqqında ciddi düşünməyə, prioritetləri nəzərdən keçirməyə və sağlamlığımızın lehinə düzgün seçim etməyə məcbur edir.