Fransa prezidenti Emmanuel Makron ilə İtaliyanın baş naziri Corcia Meloni arasında Ukrayna ilə bağlı fikir ayrılığı diplomatik qalmaqala səbəb olub.

KONKRET.az xəbər verir ki, bu barədə Financial Times yazır.

Qəzetin məlumatına görə, gərginlik cümə günü baş verib. Makron Melonini prezident Volodimir Zelenski və ABŞ-ın keçmiş prezidenti Donald Trampla görüşdə iştirak etməməsinin səbəbləri barədə “yalan məlumat yaymaqda” ittiham edib.

Meloni jurnalistlərə bildirib ki, İtaliya Ukraynada mümkün sülh razılaşmasından sonra oraya qoşun yerləşdirməyi təklif edən “istəkli dövlətlər koalisiyasına” qoşulmaqdan imtina etdiyi üçün bu görüşə dəvət edilməyib. Lakin Makron bu iddianı təkzib edib və qeyd edib ki, nə Tiranada, nə də Kiyevdə bu məsələ müzakirə olunmayıb.

Fransa lideri həmin görüşdə Almaniya kansleri Fridrix Merts, Böyük Britaniyanın baş naziri Kirm Starmer və Polşa baş naziri Donald Tusk ilə birgə iştirak edib. Meloni isə orada olmayıb.

Mənbənin bildirdiyinə görə, kansler Merts şənbə günü, Lüdovik XIV-in təşəkkür messası öncəsi Meloni ilə görüşərək tərəfləri barışdırmağa çalışıb. O, hər iki liderin İtaliyanın Ukrayna ilə bağlı Avropa sülh təşəbbüslərində mühüm rol oynamalı olduğunu qəbul etdiyini bildirib.

İtaliyada isə Meloninin görüşdən kənarda qalması geniş rezonans doğurub. Bəzi siyasətçilər onu ölkəni qəsdən Avropa səhnəsindən kənarda qoymaqda və səbəbləri təhrif etməkdə ittiham ediblər. Hətta bəzi iddialara görə, Makrona olan şəxsi antipatiyası Meloninin qərarına təsir göstərib.

Natiq Səlim,
KONKRET.az