İqtisadiyyat Nazirliyi yanında Əmlak Məsələləri Dövlət Xidməti tərəfindən sentyabrın 16, 23 və 30-da keçiriləcək hərraclara 270 nəqliyyat vasitəsi və texnika çıxarılıb. Avtomobillərin və texnikaların buraxılış illəri 1974–2013-cü illəri əhatə edir.

Maraqlıdır, bu hərracların avtomobil bazarındakı qiymətlərə təsir etməsi mümkündürmü?

Mövzu ilə bağlı nəqliyyat məsələləri üzrə ekspert Yasin Mustafayev KONKRET.az-a açıqlama verib. Onun sözlərinə görə, satışa çıxarılan nəqliyyat vasitələrinin əksəriyyəti işlək vəziyyətdə deyil və istifadəyə məhdud yararlıdır:

Yasin Mustafayev

“Bunu bəzi insanlar alaraq, öz hesablarına təmir etdirib sürürlər. Amma avtomobillərin sayı bazara təsir göstərəcək qədər çox deyil. Hərracda olan maşınların bir qismi çox köhnədir, hətta bəziləri heç işə yaramayacaq və satılmayacaq. Ancaq ehtiyat hissələri üçün alına bilər.”

Ekspert bildirib ki, ölkəyə hər il təxminən 100 minə yaxın avtomobil gətirilir. Bu baxımdan, 270 avtomobilin satışa çıxarılması bazarda qiymətlərin formalaşmasına heç bir təsir göstərməyəcək:

“100 min maşının içində 270 avtomobil ciddi rəqəm deyil. Düşünmürəm ki, avtomobil bazarındakı qiymətlərə təsir etsin,” – ekspert vurğulayıb.

Aynurə İsmayıl

KONKRET.az