Sürücülük vəsiqəsinin olması o demək deyil ki, istədiyin avtomobili idarə edə bilərsən? Bunun üçün gərək ilk növbədə etibarnamə olsun. Azərbaycanda hələ sovetlər dövründən tətbiq olunan bu qaydaya ehtiyac varmı? Konkret.az İTV-də gedən süjetə istinadla bağlı bildirir ki, millət vəkili Qüdrət Həsənquliyev yaxın qohumların, o cümlədən ata-oğul arasında belə avtomobili idarə etməsi üçün etibarnamədən istifadə hüququnu əldə etməsini absurd adlandırıb. “Əgər hər hansı şəxs müraciət etmirsə ki, “mənim avtomobilim oğurlanıb”, onu idarə etmək üçün avtomobilini kimə verəcəksə, onun notarial qaydada təsdiq edilməsinin əhəmiyyəti nədir?”-deyən Q.Həsənquliyev bildirib ki, bununl bağlı “Yol hərəkəti haqqında” qanunda dəyişiklik edilməlidir. Nəqliyyat vasitəsini idarə etmək üçün sovetlər dönəmindən qalma etibarnamə sisteminin ölkəmizdə qalması bir qədər də gülüncdür. Artıq Avropa və inkişaf etmiş ölkələrlə yanaşı, Rusiya, Gürcüstan və Qazaxıstanda bu sahədə qanun təkmilləşdirilib. Bizdə isə etibarnaməsiz maşın sürən hər hansı sürücünü 40 manat cərimə gözləyir. Və üstəlik maşın belə olan halda cərimə meydançasına aparılır. Sürücülər də birmənalı olaraq etibarnamənin ləğv olunmasının tərəfdarıdır. Ekspertlər də düşünür ki, Azərbaycanda bunu tətbiq etmək mümkündür və burada çətin heç nə yoxdur. Bunun üçün qanuna yenidən baxılmalı və müəyyən dəyişikliklər edilməlidir. Demək olar ki, artıq neçənci ildir bununla bağlı ictimai müzakirələr keçirilsə də, hələ də aidiyyəti orqanlar bunları eşitməzdən gəlirlər. Yeri gəlmişkən, bu müzakirələrdə əsas tezis odur ki, avtomobilin etibarnamə ilə idarə edilməsi mülki hüququn prinsiplərinə ziddir. Ümid edirik ki, yaxın gələcəkdə Nuh əyyamından qalma, naftalin iyi verən bu qanun da təkmilləşdiriləcək və sürücülərin rahatlığı üçün qaydalar dəyişəcək.

Konkret.az