6 gün ərzində (11-17 oktyabr) iki dəfə cəbhə bölgəsindən uzaq Gəncənin yaşayış evlərinin gecəyarısı raketlə vurulması, dinc insanların, uşaq və qadınların qətlə yetirilməsi dövlətimizin namərd, xain, qəddar düşmənə qarşı mübarizə apardığını göstərir. Baş verənlər bütün dünyanın gözü qarşısında Ermənistanın faşist mahiyyətli dövlət olduğunu aşıq-aşkar nümayiş etdirir. Qəsbkar, irticaçı Ermənistanın silahsız, dinc azərbaycanlılara qarşı törətdiyi hərbi cinayətlərin və terror aktlarının sayı-hesabı yoxdur.

Azərbaycan Prezidenti İlham Əliyev xalqa bugünkü müraciətində Ermənistan rəhbərliyinin cinayətinin cəzasız qalmayacağını bəyan edib: “Ermənistan rəhbərliyi hərbi cinayət törədir. Dinc əhaliyə atəş açmaq özü də əməliyyat-operativ raket kompleksləri vasitəsilə atəş açmaq hərbi cinayətdir və onlar bu cinayətə görə məsuliyyət daşımalıdırlar və daşıyacaqlar”.

Hər gün Tərtər, Ağdam, Goranboy, Ağcabədi və digər şəhərlərə atəş açmaqla dinc sakinləri qətlə yetirən, yaralayan, evləri dağıdan işğalçıya Azərbaycan Ordusunun mərdi-mərdanə döyüş meydanında cavab verdiyini bildirən Prezident bu cür namərd hərəkətlərin Azərbaycan xalqının iradəsini qıra, sındıra bilməyəcəyini söyləyib.

KONKRET.az-a danışan politoloq Teymur Atayev hesab edir ki, Gəncənin dinc əhalisinə gecə vaxtı zərbələr endirməklə Ermənistan özünə hökm çıxarıb və ermənilərin əzabkeş millət olması barədə illərdir reklam etdiyi mifləri darmadağın edib.

“Bu Ermənistanın hərbi-siyasi rəhbərliyinin can verməsinin göstəricisidir. Növbəti dəfə sübut olunur ki, erməni tərəfi yalnız silahsız və dinc insanlara hücum etmək üzrə mahirdir. Xocalıda da belə olub, bu gün də bu, baş verir. Yəqin ki, özlərinə bəraət qazandırmağa cəhd edəcəklər, amma bu, Bynəlxalq Cinayət Məhkəməsinin Roma Əsasnaməsinə uyğun olaraq hərbi cinayətdir”, – deyə politoloq vurğulayıb.

Xatirə Sadiq,

KONKRET.az