“Bakı Metropoliteni” QSC hazırda gücləndirilmiş iş rejimində çalışır.

 KONKRET.az xəbər verir ki, bu barədə Report-a qurumun mətbuat xidmətinin rəhbəri Bəxtiyar Məmmədov bildirib.

B.Məmmədovun sözlərinə görə, sərnişin sayının artmasına baxmayaraq metroda qatarlar arasında intervalın azaldılması mümkün deyil:

“Hazırda metro qatarlarının arasında interval 2 dəqiqəyə bərabərdir. Bu isə ən optimal formadır. Hətta biz istəsək belə, texniki imkan bu intervalı azaltmağa imkan vermir. Onu da əlavə edim ki, hazırda müşahidə edilən sıxlıq 2019-cu ilin göstərcilərindən aşağıdır.

İyunun birindən etibarən metronun havalandırma sistemi yay rejiminə keçdi. Qatarların hərəkəti ilə bağlı qərar isə iyunun sonu iyulun əvvəlində veriləcək. Hazırda isə qış rejimi qüvvədədir və gün ərzində xəttə 40-46 qatar çıxarılır”.

“Bakı Metropoliteni” hazırda sərnişin axınının artmasının monitorinqinin aparıldığını qeyd edib.

Əlavə edək ki, hazırda Bakı metrosunda 315 vaqon və 63 qatar var ki, onlardan 19-u yeni nəsil qatarlarıdır.

Qeyd edək ki, iyunun 10-12-si tarixlərində Bakıda keçiriləcək Formula-1” yarışları ilə əlaqədar olaraq paytaxtın bəzi yolları bağlanıb. Bu səbəbdən də ictimai nəqliyyatdan, xüsusilə də metrodan istifadə edən sərnişinlərin sayı artıb.

Hazırda metropoliten xətlərində hərəkət 30 qatar cütü ilə təşkil edilir. Amma yay rejimində sərnişinlərin azalması ilə qatar cütlərinin sayı 20-yə qədər azaldılır.