ABŞ Dövlət Departamenti ilə Azərbaycan Respublikası arasında imzalanan anlaşma memorandumunun mətni dərc olunub. Sənədin bir illik müddətlə nəzərdə tutulması diqqət çəkib.

Bəs görəsən, niyə bir illik imzalanıb?

Mövzunu KONKRET.az-a şərh edən politoloq Züriyyə Qarayeva bildirib ki, memorandumun qısa müddətlik imzalanması bir neçə mühüm məqamı gündəmə gətirir:

Züriyyə Qarayeva

“Əvvəla, sənədin yalnız bir il üçün nəzərdə tutulması tərəflərin əməkdaşlığa açıq olduqlarını, eyni zamanda gələcəkdə prosesin nəticələrinə görə memorandumu yeniləmək və ya dəyişdirmək imkanını saxlamaq istədiklərini göstərir. Bu, diplomatiyada elastiklik prinsipinə əsaslanır. Yəni tərəflər uzunmüddətli öhdəliklərə girmədən qarşılıqlı inamı və əməkdaşlığın real nəticələrini sınaqdan keçirirlər”.

Politoloqun sözlərinə görə, bir illik müddət həm də ehtiyatlı mövqeyin göstəricisi kimi qiymətləndirilə bilər:

“ABŞ və Azərbaycanın regional geosiyasi mühitdə üzləşdiyi faktorlar, enerji təhlükəsizliyi, Cənubi Qafqazda davam edən sülh prosesi və qlobal güclər arasındakı rəqabət tərəfləri ölçülü-biçili addımlar atmağa vadar edir. Bu baxımdan, memorandum həm əməkdaşlığa hazırlığın, həm də nəticələrdən asılı olaraq münasibətlərin dərinləşdirilə biləcəyinin mesajıdır”.

Nəticə etibarilə, Qarayeva vurğulayıb ki, sənəd bir tərəfdən iki ölkə arasında dialoq və əməkdaşlığın institusional çərçivəsini müəyyənləşdirir, digər yandan isə hər iki dövlətə gələcək inkişaf istiqamətlərini qiymətləndirmək üçün manevr imkanı yaradır.

Müşviq Tofiqoğlu

KONKRET.az