ABŞ lideri Co Bayden xarici siyasətdə öz təcrübəsini yüksək qiymətləndirib.

KONKRET.az xarici mediaya istinadən xəbər verir ki, o, 100 yaşlı veteran diplomat Henri Kissincer də daxil olmaqla, bu işdə heç kimdən geri qalmadığını söyləyib.

“Düşünürəm ki, mən Amerikanın xarici siyasətini bu gün yaşayan hər kəs, o cümlədən Kissincer qədər bilirəm”, –  deyə ABŞ Prezidenti bildirib.

Bundan əlavə, Bayden zarafatla deyib ki, o, bütün həyatı boyu, son 207 ildə xarici siyasətlə məşğul olub.

ABŞ lideri Ukrayna hökumətini müharibənin başlaya biləcəyi ilə bağlı xəbərdarlıq etdiyinə də diqqət çəkib.

Qeyd edək ki, Barak Obamanın dövründə vitse-prezident olmamışdan əvvəl Co Bayden 30 ildən çox Senatda Delaver ştatını təmsil edib, o cümlədən Xarici Əlaqələr Komitəsinin sədri olub.

Nobel Sülh Mükafatı laureatı Henri Kissincer isə 1970-ci illərdə Riçard Nikson və Cerald Fordun prezident olduqları vaxtlarda diplomat və milli təhlükəsizlik müşaviri olub. Kissincer bu yaxınlarda 100 yaşını qeyd edib.

İqbal Rzayev,

KONKRET.az