Dişlərimizin sağlam qalması üçün təkcə diş fırçalamaq kifayət etmir. Gündəlik yediyimiz və içdiyimiz qidalar dişlərimizə ciddi təsir göstərir. Bəzi qidalar diş minasını zəiflədərək çürük əmələ gəlməsinə səbəb ola bilər. 

KONKRET.az dişlərə zərər verən qidaları və onlardan qorunma yollarını təqdim edir:

Şəkərli və şirin qidalar

Konfet, tort, şokolad, peçenye və digər şəkər tərkibli qidalar bakteriyaların qidalanması üçün mükəmməl mühit yaradır. Şəkər ağız boşluğunda turşuya çevrilir və bu da diş minasını zəiflədir.

Qazlı içkilər və enerji içkiləri

“Kola”, “Fanta” kimi qazlı içkilər təkcə şəkər deyil, həm də turşu tərkiblidir. Bu içkilər diş minasını incəldir və çürüməyə səbəb olur.

Turşulu meyvələr və şirələr 

Portağal, limon, qreypfrut kimi turşulu meyvələr və onların şirələri diş minasını aşındıra bilər. Xüsusilə, bu içkiləri tez-tez və uzun müddət içmək dişlərə daha çox zərər verir.

Çipslər və ağ un məmulatları

Kartof çipsləri, ağ çörək və makaron kimi qidalar ağızda nişastaya çevrilərək şəkər kimi təsir edir. Bu da bakteriyaların çoxalmasına və çürük yaranmasına səbəb olur.

Alkoqollu içkilər

Alkoqol ağız suyunun miqdarını azaldır və ağızın qurumasına səbəb olur. Ağız suyu dişləri qorumaq üçün vacibdir, çünki turşuları neytrallaşdırır və dişləri yuyur.

Tünd rəngli qəhvə və çay

Çox istifadə edildikdə dişlərdə ləkələr yaradır və zamanla diş minasını zəiflədə bilər. Şəkərli içildikdə isə daha zərərli olur.

Dişlərimizi bu qidalardan necə qoruyaq?  

Şəkərli və turşulu qidalardan sonra ağzı yuyun

Şəkərli və turşulu qidaları yedikdən sonra ağızı su ilə yaxalamaq və ya şəkərsiz saqqız çeynəmək ağızdakı turşunu neytrallaşdıra bilər.

Dişləri gündə iki dəfə fırçalayın

Xüsusilə səhər və yatmazdan əvvəl florid tərkibli diş pastası ilə fırçalamaq diş minasını gücləndirir.

  Qazlı və şirin içkiləri azaldın və pipetlə için

Bu içkiləri mümkün qədər az istifadə edin. Pipetlə içmək dişlərə birbaşa təmasını azaldır.

Su içməyi unutmayın  

Su ağız suyunun istehsalını artırır və dişlərin təbii təmizlənməsinə kömək edir.

Süd və süd məhsulları istifadə edin

Süd, pendir və qatıq kimi kalsium və fosforla zəngin qidalar diş minasını gücləndirir.

Diş həkiminə mütəmadi getmək 

Hər altı aydan bir diş həkiminə gedərək yoxlanışdan keçmək çürümənin qarşısını almağa kömək edir.

Dişlərimizi qorumaq üçün həm düzgün qidalanmalı, həm də mütəmadi ağız baxımına diqqət yetirməliyik. Sağlam qidalanmaq və diş baxımına önəm vermək, çürüklərin qarşısını almağın ən təsirli yoludur./yenisabah