Çində iki güclü istixana qazının emissiyaları son on ildə 78 faiz artıb.

KONKRET.az xəbər verir ki, bu qazlar televizor, yarımkeçirici istehsal və alüminium əritmə proseslərində istifadə olunur. Daha çox istilik saxlamaq qabiliyyətinə malik olan bu qazlar minlərlə il atmosferdə qala bilir.

Tədqiqat 2011-2021-ci illər arasında Çində tetrafluorometan və heksafluorometan emissiyalarını araşdırıb. 2020-ci ilə qədər bu qazların qlobal emissiyalarının 64-66 faizi Çindən qaynaqlanır. Bu artım göstərir ki, dünyada emissiyaların artması əsasən Çinin hesabınadır. Emissiyalar ölkənin qərb rayonlarındakı sənaye bölgələrindən gəlir və xüsusilə alüminium sənayesi ilə bağlıdır.

Çin dünyanın ən böyük alüminium istehsalçısı və ixracatçısıdır. Ötən il Çinin alüminium istehsalı 41,5 milyon tona çatıb. Bu sürətli istehsal artımı onu göstərir ki, yüksək səviyyəli flüorokarbon emissiyaları ölkənin karbon neytrallığı məqsədini və qlobal iqlim səylərini təhdid edə bilər. Çin 2030-cu ilə qədər karbon emissiyalarını pik həddə çatdırmağı və 2060-cı ilə qədər karbon neytral olmağı hədəfləyir.

Bu artım texnoloji yeniliklər və alüminium sənayesinin karbon bazarına daxil edilməsi ilə azaldıla bilər. Çin tullantıların daha yaxşı idarə edilməsi məqsədilə dövlət proqramı da hazırlamaq niyyətindədir.

Qeyd edək ki, alüminium istehsalı CO2 emissiyalarının əsas mənbəyi olsa da, günəş panelləri, elektrik nəqliyyat vasitələri və külək turbinləri kimi aşağı karbonlu texnologiyaların istehsalında da mühüm rol oynayır. Dünya İqtisadi Forumu iddia edir ki, alüminium sənayesi səmərəli istehsalı təmin etmək və iqlimə mənfi təsirləri azaltmaq arasında balans tapmalıdır.

Günel Mikayılova,

KONKRET.az