Bu gün səhər saatlarında Türkiyənin Diyarbakır vilayətinin Sur rayonuna bağlı Erveni kəndində dəhşətli cinayət hadisəsi baş verib.

KONKRET.az xəbər verir ki, sakinlər səhər saatlarında yanan bir yük maşını görərək dərhal 112 Təcili Yardım Xidmətinə məlumat veriblər.

Hadisə yerinə cəlb olunan jandarma, yanğınsöndürmə və tibbi yardım qrupları yanğını söndürdükdən sonra maşında iki nəfərin yanmış meyitini aşkar ediblər. Meyitlərin 50 yaşlı Remzi Sati və onun 15 yaşlı oğlu Məhəmməd Satiyə aid olduğu müəyyənləşib.

İlkin araşdırmalara görə, ata və oğul əlləri bağlanaraq avtomobilə yerləşdirilib və üzərlərinə benzin tökülərək yandırılıb. Onların heyvan alveri ilə məşğul olduqları bildirilib. Mərhumların cəsədləri otopsiya üçün Diyarbakır Ədliyyə Tibb Məntəqəsinə göndərilib.

Hadisə ilə bağlı Sur Rayon Jandarma Komandanlığı və Diyarbakır Baş Prokurorluğu genişmiqyaslı istintaqa başlayıb. Cinayəti törədən şəxslərin kimliyi və motivi hələ müəyyənləşdirilməyib. Hadisə bölgədə və ictimaiyyətdə böyük rezonans doğurub.

Natiq Səlim,
KONKRET.az