Sabahdan ali məktəblərə qəbul üçün ixtisas seçimi mərhələsi başlayır. Buna baxmayaraq, ixtisas seçimi üçün “Abituriyent 4” jurnalı hələ də nəşr edilməyib. Dövlət İmtahan Mərkəzi (DİM) elan edib ki, jurnal bu gün satışda olacaq.
Mövzu ilə bağlı təhsil eksperti Kamran Əsədov da narazılığını bildirib:
“Bu gün çap olunan jurnal ucqar kəndlərə nə vaxt çatacaq? Abituriyentləri bu qədər gərginliyə salmaqda DİM-in məqsədi nədir? Məndə may ayında bu ilin qəbul pıan yeri və elə “Abituriyent 4”-də olacaq bütün informasiyalar var. Bəs 3 aydır qurum niyə bunu çap etmir?
Dövlət İmtahan Mərkəzi abituriyentlərə müraciət edir ki, ixtisas seçimi ilə bağlı heç kimə müraciət etməyin, özünüz ixtisasları seçin. Məhz elə hər il DİM-in yalnış statistik yanaşmasına görə yüzlərlə 500-600-dən çox bal toplayan abituriyent qəbul ola bilmir və ya istəmədiyi ixtisasa qəbul olur. Ardınca da DİM özü özəl universitetlərdə abituriyent məsləhət mərkəzi yaradır.
Dünyanın bütün ölkələrində karyera məsləhətçiləri var və onlar ödənişli əsaslarla xidmət edirlər. Çünki gənclər ali məktəblərin ixtisasları barədə məlumatlı deyillər. Hətta DİM-in təlim keçdiyi o məsləhət mərkəzində oturub öz özəl universitetlərini abituriyentə sırıyan təlimçilərin də ixtisaslar barədə məlumatı yoxdur. Məsələn, hətta DİM-in 1653-də vətəndaşa cavab verən işçiləri belə l ixtisas qrupu üzrə Geologiya və geofizika mühəndisliyi ilə Geomatika və geodeziya mühəndisliyi ixtisasının mahiyətini aça, fərqini izah edə bilmir. I qrup abituriyentdən soruşdum ki, Mexanika ixtisası nədir? Sənə hansı gələcəyi vəd edir? Cavab verə bilmədi. Hörmətli DİM, 11-ci sinifi bitirən şagird nə bilsin Mühəndis fizikası ixtisası nədir?
Siz I qrupdakı Ekologiya mühəndisliyi ixtisası ilə IV ixtisas qrupundakı Ekologiyanın fərqini deyə bilərsiz? 11-ci sinif şagirdi nə bilsin Materiallar mühəndisliyi nəyə lazımdır? Mədən mühəndisliyi ixtisası ilə Geologiya ixtisasının fərqi harda yazılıb ki, abituriyent də bilsin?
Logistika və nəqliyyat texnologiyaları ixtisasının Nəqliyyat mühəndisliyi ixtisasından fərqi hansı 2024-cü il vəsaitinizdə yazılıb? Hörmətli DİM, 17 yaşlı abituriyent Marketinq ixtisasını niyə seçməli olduğunun cavabını haradan tapsın? Nəqliyyatda servis ixtisasının nədən bəhs etdiyini necə bilsin? Mən soruşmuşam sizin 1653 xidmətindən və Abituriyent Məsləhət Mərkəzlərindən amma cavab verə bilməyiblər ki, Cihaz mühəndisliyi, Maşın mühəndisliyi, Mexanika mühəndisliyi, Proseslərin avtomatlaşdırılması, Mexatronika və robototexnika kimi ixtisasların mahiyyəti və bir-birindən fərqi nədir”.
Mövzu ilə bağlı KONKRET.az DİM-ə sorğu ünvanlayıb.
DİM-in mətbuat katibi Xanlar Xanlarzadə bildirib ki artıq abituriyent jurnalı nəşr olunub:
“Jurnal artıq nəşr olunub. İxtisas seçimi 9-19 avqust tarixlərində olacaq. Abituriyentlərin seçim etmək üçün kifayət qədər vaxtı var. Yəni fərqi yoxdur sabah seçim edirsən və ya ayın 19-u edirsən. Əsas odur ki, verilən 11 gün ərzində seçimi təsdiq edəsən. Jurnal rayonlara da bu gün göndəriləcək”.
Mətbuat katibi jurnalın nəzərdə tutulan vaxtda nəşr olunduğunu bildirib:
“Jurnalın nəşri gecikməyib, nəzərdə tutulan vaxtda nəşr olunub. İxtisas seçimi hələ başlamayıb”.
Aygün Mirakif
KONKRET.az