“Yol hərəkəti zamanı, o cümlədən işıqforun qırmızı işığında və ya tıxacda dayanarkən sürücülərin mobil telefondan istifadə etməsi qanunla qadağandır. Bu cür hallarda sürücü yol hərəkətinin aktiv iştirakçısı hesab olunur və telefonla danışmaq məsuliyyət yaradır”.

Bu barədə hüquqşünas Elşad İsayev KONKRET.az-a açıqlamasında danışıb.

“Azərbaycan Respublikasının İnzibati Xətalar Məcəlləsinin 338.1.1-ci maddəsinə əsasən, maşın sürərkən sürücülərin telefondan istifadə etməsi, yəni qulaqcıqsız və ya avtomobilin multimedia sisteminə qoşulmadan danışması 50 manat məbləğində cərimə ilə nəticələnir. Qeyd olunan qayda, yalnız hərəkət zamanı deyil, işıqforun qırmızı işığında və ya tıxac şəraitində dayanma zamanı da qüvvədədir”.

Hüquqşünas vurğulayıb ki, qanunvericiliyə görə, avtomobil hərəkətdə olmasa belə, sükan arxasındakı şəxs yol hərəkətində iştirakçı sayıldığından, telefondan istifadəsi inzibati xətadır.
“Bu baxımdan sürücülərə tövsiyə olunur ki, dayanma zamanı belə telefondan istifadədən çəkinərək qaydalara riayət etsinlər”.

Müşviq Tofiqoğlu

KONKRET.az