Xəbər verdiyimiz kimi, “Hraparak” qəzeti Ermənistanın Avstriyadakı konsulluğunda çalışan Aşken Aleksanyan adlı qadının 2 ay əvvəl Azərbaycana casusluqda ittiham olunaraq İrəvanda hava limanında saxlanıldığını yazıb.

KONKRET.az globalinfo-ya istinadən bildirir ki, “Faktor Armenia” məsələ ilə bağlı yeni detalları öyrənib.

Məlumata görə, Aleksanyan Milli Təhlükəsizlik Nazirliyində dindirilmə zamanı bəzi detalları açıqlayıb. O, azərbaycanlı biri ilə romantik münasibət yaşadığını və ondan pul aldığını deyib.

Nəşr yazır ki, Aleksanyan hətta tək işləmədiyini, Xarici İşlər Nazirliyində müxtəlif vəzifələrdə çalışan bir neçə şəxslə əlbir olduğunu və Azərbaycana məxfi məlumatlar ötürdüyünü deyib.

Məlumata görə, Ermənistan xüsusi xidmət orqanları artıq Xarici İşlər Nazirliyində əməliyyat keçirib və bir neçə şəxsin komputeri müsadirə olunub.

İddialara görə, Aleksanyanın XİN-də çox vacib strateji məlumatlara çıxışı olub və onları azərbaycanlı olduğu dediyi sevgilisinə ötürüb. Hadisə ilə bağlı araşdırmanın davam etdiyi bildirilir.