Sosial şəbəkələrdə Gəncə şəhərinin çıxışındakı stasionar polis postunda bir hərbçinin şəhərə avtomobillə buraxılmaması ilə bağlı yayılan görüntülər Gəncə Şəhər Baş Polis İdarəsində araşdırılıb.

Daxili İşlər Nazirliyi mətbuat xidmətinin Gəncə regional qrupundan KONKRET.az–a verilən məlumata əsasən, dekabrın 25-i gecə saatlarında hərbçi müştəri qismində taksi ilə Gəncə şəhərinin Hacıməlikli girişində stasionar polis postundan şəhərə daxil olmaq istəyərkən polis əməkdaşları tərəfindən saxlanılıb. Taksi sürücüsünün müvafiq icazəsi olmadığı müəyyən edilərək şəhərə girişi qadağan olunub, hərbi geyimli şəxs isə avtomobildən düşərək piyada şəhər ərazisinə daxil olub. Həmin şəxsin video çəkərək, polis əməkdaşlarının güya ondan pul istəməsi ilə bağlı deyilənlər isə həqiqətəuyğun deyil.