Qazaxıstanda həbs edilən müğənni Törəqəli Törəali təcridxanada cəzasını çəkmək əvəzinə Almatı küçələrində maşın sürərkən görüntülənib.

KONKRET.az yerli KİV-ə istinadən xəbər verir ki, internetdə müğənninin ötən gün Almatıda “Land Cruiser” sürdüyünə dair xəbərlər yayılmağa başlayıb.

Qeyd olunub ki,  bu yaxınlarda məhkəmə Törəalini narkotik maddənin təsiri altında avtomobil idarə etdiyinə görə 7 il müddətinə sürücülük hüququndan məhrum edib.

“Niyə maşın sürür? Hanı ədalət?”, – deyə sosial şəbəkə istifadəçiləri etirazını bildirib.

Jurnalistlər vəziyyətlə bağlı şərh almaq üçün şəhər polis idarəsinə müraciət edib.

“Bu məlumat saxtadır. Sənətçi təcridxanada həbs cəzasını çəkməyə davam edir”, – deyə hüquq-mühafizə orqanlarından bildirilib.

Qeyd edək ki, Törəqəli Törəali yol hərəkəti qaydalarını pozduğuna görə saxlanılıb. Sərxoş halda avtomobil idarə etdiyinə görə o, 20 sutka həbs və 7 il müddətinə sürücülük vəsiqəsindən məhrum edilib.

İqbal Rzayev,

KONKRET.az