Artıq iki ildir Livan ermənilərinin maliyyə dəstəyi ilə Rusiyada misli görünməmiş layihələr həyata keçirilir.
KONKRET.az xəbər verir ki, həmin layihələrə Ümummilli Erməni Təhsil və Mədəniyyət Birliyinin Rusiya strukturunun şöbə sədri Artur Paytyan rəhbərlik edir.
Açıq informasiya mənbələrində göstərilir ki, layihənin əsas məqsədi erməni diasporu arasında maarifləndirmə və mədəniyyət fəaliyyətini həyata keçirməkdir. Qeyd edək ki, Birlik Rusiyada fəaliyyətə 2021-ci ilin mart-aprel aylarında başlayıb. Bir çox strukturlardan fərqli olaraq, Livanın Beyrut şəhərində yerləşən Hamazkayin mərkəzi administrasiyası ilk dəfədir ki, Rusiyada güclü fəaliyyətə başlayıb.
Bənzər bir strukturun Rusiyada yaradılması hələ indiyə qədər görünməmişdi. 26 ildir bu ölkədə yaşayan Artur Paytyan vasitəsilə həm təhsil, həm də mədəni mühitdəki boşluğu doldurmaq adı altında xüsusi təşkilatlanma aparılır, xüsusilə ermənilərin sıx məskunlaşdığı ərazilərdə erməni diasporu arasında Qərb və ABŞ agenturası yerləşdirilir.
Rusiyada ermənilərin təhsil və mədəniyyət bölmələri, eləcə də kilsənin digər icma strukturları və səfirliyin fəaliyyəti ilə sıx əlaqədə olan Artur Paytyan Livandakı Mərkəzdən xüsusi tapşırıqlar alır. Bu tapşırıqlardan biri də ölkədə yaşayan erməni uşaqların erməni dilini bilməməsi ilə bağlı ciddi problemləri aradan qaldırmaqdır. Əslində isə son üç ildə Ermənistandan Rusiyaya gedənlərin artması kilsəni ciddi narahat etməyə başlayıb. Belə ki, həmin ölkəyə köçən ermənilər bir neçə il yaşadıqdan sonra övladlarını tədrisin rus dilində aparıldığı məktəbə verirlər. Ona görə də həm gündəlik həyatlarında, həm də digər yerlərdə erməni uşaqlar rus dilində ünsiyyət qururlar. Artıq Rusiyada əksər ailələr ermənicə danışmır. Kilsə hesab edir ki, Rusiyada yaşayan ermənilər tatarlar və şorlar, eləcə də digər xalqlar kimi əriyib yox olurlar. Layihənin nizamnaməsində xüsusi olaraq qeyd edilir ki, əksər hallarda valideynlər şüurlu şəkildə buna gedirlər.
Kilsə ruhaniləri dəfələrlə vurğulayıb ki, belə olan halda uşaqlarla erməni dilində danışa bilmək, onları tarixi vətənlərinə yönləndirmək, guya mədəni irsləri ilə daha yaxından tanış etmək mümkün olmayacaq. Layihə isə qarşısına məqsəd qoyub ki, Rusiya dağılacağı təqdirdə əksər ermənilər öz vətənlərinə geri dönməlidir. Çünki Ermənistan boşalarsa, bu adda dövlət də olmayacaq. Ona görə də maarifləndirmə adı altında Livandakı mərkəzin ilk işi İrəvandakı ofislərinin xətti ilə Ermənistanda nəşr etdirdiyi kitabları Rusiyaya daşıyır.
Eləcə də Rusiyada Ermənistan üçün silahlar almaq üçün vəsaitlərin toplanması üçün bir çox mədəniyyət bölmələri müxtəlif formatlarda tədbirlər, məclislər və şənliklər təşkil edir. Həmin tədbirlərə başqa ölkələrin vətəndaşları da cəlb olunur. Yəqin ki, Rusiya xüsusi xidmət orqanları, eləcə də Azərbaycanın müvafiq strukturları bu məsələni diqqətdə saxlayır.
KONKRET.az-ın ARAŞDIRMA QRUPU