Rusiya Qarabağı rəsmən Azərbaycanın ərazisi kimi tanıyır və Putinin müşaviri Vladimir Medinskinin sözlərini kontekstdən çıxarmamağa çağırır.

KONKRET.az xəbər verir ki, bunu TASS-a Rusiya Xarici İşlər Nazirliyinin rəsmi nümayəndəsi Mariya Zaxarova deyib.

“Mövcud olmayan tezisləri kontekstdən çıxarıb sözləri dəyişməyə, onlara tamam başqa məna verməyə ehtiyac yoxdur”, – diplomat qeyd edib.

O, Rusiyanın Qarabağı rəsmi olaraq Azərbaycanın ərazisi kimi tanıdığını vurğulayıb.

Zaxarovanın sözlərinə görə, Medinski Qarabağla bağlı şərhində vəziyyətin tarixi aspektindən və sosial-mədəni xüsusiyyətlərindən danışıb.

Xatırladaq ki, Vladimir Medinski RT-yə müsahibəsində “Ermənistanla Azərbaycan arasında mübahisəli bölgə – Qarabağ var idi” demişdi. Bundan sonra Azərbaycan Xarici İşlər Nazirliyi ona öz yurisdiksiyasına aid olmayan yalan bəyanatlar verməklə dövlətlərarası münasibətlərə xələl gətirməməyi tövsiyə edib.

Müşviq Tofiqoğlu

KONKRET.az