Rusiyadan gedən qaçqınlarla yanaşı, bu ölkəyə postsovet ölkələrindən miqrantların da güclü axını başlayıb.

Rus millətçiləri bunu dövlətin gələcəyi üçün ciddi təhlükə görür. Amma Putin administrasiyasının miqrant siyasəti bir qədər fərqlidir. Bəzi analitiklər hesab edir ki, miqrant axını imperializm istiqamətini gücləndirsə də, rus xalqında şovinizm hisslərini artırıb.

Artıq Rusiyanın ayrı-ayrı bölgələrində, hətta ucqar kəndlərdə rus kəndliləri ilə miqrantlar arasında qarşıdurma hallarının sayı artıb.

Ümumiyyətlə, şovinistlər hesab edir ki, Rusiyada miqrantlarla bağlı vəziyyət ürəkaçan deyil. Ona görə də hüquq-mühafizə orqanlarında yüksək vəzifələrdə çalışan millətçi kadrların təbəşşüsü və iradəsi ilə son vaxtlar miqrantlar arasında daha tez-tez reydlər keçirilməyə başlayıb.

Amma buna baxmayaraq, yerli sakinlərlə qarşıdurma hallarının sayı azalmayıb.

Şovinistlərə görə, hətta bəzi kiçik kəndlərdə belə miqrantlar öz şərtlərini diktə etməyə, öz qaydalarını yaratmağa başlayıblar.

Konkret olaraq vurğulanır ki, gəlmələr idman meydançalarını və pulsuz istirahət mərkəzlərini zəbt ediblər. Eləcə də rus qızlarına qarşı özlərini olduqca əxlaqsız aparırlar. Onlara görə, rus qızları əyləncə və eyş-işrət üçün lazımdır. Belələri gecələr asayişi pozur, icazəsiz olaraq qızların evinə belə soxula bilirlər.

Pullu parklarda belə ödənişsiz maşınlar saxlayan qeyri-rus millətindən olanlar çoxluqda müxtəlif idarə və təşkilatların işinə təsir etməyi də bacarırlar. Doğrudur, bu cümlələri oxuyan hər kəs əslində Rusiyada daxili bir xaosun olduğunu düşünə bilər. Bu, əslində belə deyil. Amma görünən odur ki, sanki gizli əl miqrantlara qarşı nifrət hissini yenidən gücləndirməyə çalışır.

Kreml isə bu məsələdə narahat görünmür. Miqrantların Rusiyanın içərilərini işğal etməsi fikri onlara görə yanlış yanaşmadır. Çünki miqrantlar qocalmaqda olan ölkəni məhv olmaqdan xilas edə bilər.

Hazırladı: Rəsmiyyə Şərifova,

KONKRET.az