Rusiyanın Ermənistandakı 102-ci hərbi bazası təkcə regional təhlükəsizlik məsələsi deyil, həm də Ermənistanın daxili siyasətinə və suverenliyinə təsir edən amil kimi dəyərləndirilir. Rəsmi İrəvan son illərdə Qərblə yaxınlaşmaq istiqamətində müəyyən addımlar atsa da, bu baza ölkədə qalmaqda davam edir. Hüquqi müstəvidə baza 1995-ci ildə imzalanmış ikitərəfli sazişə əsasən 2044-cü ilə qədər Ermənistanda yerləşməlidir.

Azərbaycan Prezidenti İlham Əliyevin “Əl-Ərəbiyyə” telekanalına verdiyi müsahibədə bu məsələyə diqqət çəkməsi təsadüfi deyil. Dövlət başçısı bildirib ki, Rusiyanın Azərbaycanda bir nəfər belə əsgəri yoxdur, amma Ermənistanda hərbi bazası var.

Ermənistan Gümrüdəki bu bazanı niyə çıxarmır? Hüquqi mexanizmlər nədən ibarətdir? Moskva bu baza vasitəsilə Ermənistanda sabitliyi pozmağa və Baş nazir Nikol Paşinyanı devirməyə cəhd edə bilərmi?

KONKRET.az xəbər verir ki, globalinfo.az-a danışan politoloq Zaur Məmmədov deyib ki, razılaşmaya görə, 102-ci hərbi baza 2044-cü ilə qədər Ermənistanda qalmalıdır:

“Bu kontekstdə hüquqi prosedurlar mövcud Ermənistan hakimiyyətinin əlini daraldır. Çünki əvvəlki hakimiyyətlər tərəfindən bu məsələ artıq razılaşdırılıb və təsdiqlənib. Lakin bəlli məsələdir ki, son zamanlar Gümrüdə ermənilərin aksiya keçirməsi təsadüfi deyil. Bu, hazırkı hakimiyyətin sifarişidir və məqsəd bazanı Ermənistandan çıxarmaqdır.

Prezident İlham Əliyevin də “Əl-Ərəbiyyə” telekanalına verdiyi müsahibədə bu məsələyə diqqət çəkməsi təsadüfi deyil. Cənab Prezident də mümkün ssenariləri istisna etmir. Bəllidir ki, Paşinyan Qərbə inteqrasiya edir. Bu proses fonunda onun devrilməsinə də çalışa bilərlər. Ona görə də Ermənistandakı seçkilərə qədər Paşinyan belə bir addım ata bilməz. Amma sonrakı proseslərdə onun bu məsələyə daha intensiv yanaşması mümkündür. Hər halda, Cənubi Qafqazın gələcəyi baxımından bu məsələnin həlli vacibdir”.