İdmansevərlərin fikrincə, planetin ən yaxşı futbolçusu olan Pele Braziliya Milli Komandası ilə karyerasına sığışdırdığı 3 dünya çempionatı, klub və fərdi uğurları ilə iz qoyaraq həyatla vidalaşıb.
KONKRET.az xəbər verir ki, gənclik illərində kafelərdə ofisiant işləyən və müəyyən yaşa qədər futbol topu belə olmayan Pele yaşıl meydanlara ilk addımını “Bauru Athletic Club” ilə atıb və 1954-1956-cı illərdə Sao Paulo Gənclərin Ştat Çempionatında ardıcıl 3 dəfə çempion olub.
Məşqçisi Valdemar de Brito tərəfindən “Santos” klubuna aparılan Pelenin uğurlu karyerası 1956-cı ildə ilk peşəkar müqaviləsini orada imzalaması ilə başlayıb. Cəmi 16 yaşında ikən “Santos”da oynadığı il ərzində ən çox qol vuran Pele “Real Madrid”, “Yuventus” və “Mançester Yunayted”dən transfer təklifləri alsa da, onu “milli sərvət” kimi qələmə verən Braziliya hökuməti komandadan ayrılmasına icazə verməyib. Komandada işlədiyi 19 il ərzində Pele 10 dövlət və 6 liqa, iki Libertadores Kuboku və Qitələrarası Kubok qazanıb.
1958-ci ildə İsveç, 1962-ci ildə Çili və 1970-ci ildə Meksikada keçirilən dünya kuboklarını “Sambaçılar”la 3 dəfə qazanan Pele qurumda 3 kuboka sahiblənən yeganə oyunçu kimi tarixə düşüb. “Qara mirvari” ləqəbli Pele 1957-1971-ci illərdə Braziliya millisinin heyətində 92 dəfə çıxış edib və 77 qol vurub. Pele “Santos”dan ayrıldıqdan sonra futbolçu karyerasını Amerika qitəsində davam etdirib. 1975-1977-ci illər arasında ABŞ liqa komandalarından olan “New York Cosmos”da mübarizə aparan əfsanəvi braziliyalı oyunçu liqa çempionluğunu qazanıb.
Əfsanəvi Pele futbolçu karyerasından sonra ölkəsində idman naziri, FİFA və “Santos”un futbol səfiri, “New York Cosmos”un fəxri sədri, Birləşmiş Millətlər Təşkilatı və YUNESKO-nun xoşməramlı səfiri vəzifələrində çalışıb. “Qara mirvari”, “Futbol kralı”, “Kral Pele” ləqəbli əfsanəvi futbolçu min qol həddini aşan oyunçulardan biri olub. Pele 1363 oyunluq karyerasında 1279 qol vuraraq Ginnesin Rekordlar Kitabına düşüb. 1969-cu ildə Kolumbiyada keçirilən oyunda Pele hakimlə mübahisədən sonra meydandan qovulub. Lakin polis baş verənlərdən qorxduğu üçün Pele dərhal oyuna qaytarılıb. Bu hadisədən sonra hakim oyunu tərk edib. Pele heç bir olimpiadada iştirak etməsə də, Qiymət Komitəsi onu “Əsrin idmançısı” adlandırıb.1959-cu ildə Pele bir mövsümdə 129 qol vuraraq öz rekordunu yeniləyib.
82 yaşında dünyasını dəyişən əfsanəvi futbolçu uğurla dolu karyerasında Türkiyə komandalarından yalnız “Fənərbaxça”ya rəqib olu. 1972-ci ildə İnönü stadionunda keçirilən matçda Pelenin formasını geyindiyi “Santos” sarı-göyləri 6-1 hesabı ilə məğlub edib. Qarşılaşmanın 35-ci dəqiqəsində Pele qolu ilə meydanı ayağa qaldırmağı bacarıb.
Müşviq Tofiqoğlu,
KONKRET.az