Bakı Baş Gömrük İdarəsində keçirilən əməliyyat nəticəsində həbs edilən şəxslərin cinayət işi üzrə məhkəmə istintaqı başa çatıb.

KONKRET.az xəbər verir ki, Bakı Ağır Cinayətlər Məhkəməsində hakim Əli Məmmədovun sədrliyi ilə keçirilən prosesdə ilk olaraq ötən prosesdə prokurorun istintaqın yenilənməsi ilə bağlı vəsatətinə baxılıb. Məhkəmə bildirib ki, Dövlət Gömrük Komitəsindən göndərilən məktubda dövlət ittihamçısının təqdim etdiyi əsasnamənin əsassız olduğu qeyd olunub. Həmçinin qurum tərəfindən prokurorluğa hər hansı məktub göndərilməyib.

Məhkəmə vəsatəti rədd edərək, fərqli əsasnamələrlə bağlı xüsusi qərar çıxarılacağını elan edib.

Prosesdə dövlət ittihamçısı çıxış edib.

Prokuror çıxışında təqsirləndirilir şəxslərin verilmiş ittihamla təqsirli bilinmələrini – Elmar Mirzəyevin 8 il 6 ay, Sadiq İsgəndərovun 8 il 2 ay, Rafael Əzizovun 8 il 1 ay, Orxan Zöhrabovun 8 il 3 ay, Emin Xəlilovun 8 il 2 ay, Azər Baxşyevin 8 il 2 ay, Mirağa Ağayevin 8 il 3 ay, Ceyhun Şabanovun isə 8 il müddətinə azadlıqdan məhrum edilməsini istəyib.

Bildirilib ki, təqsirləndirilən şəxslər cəzalarını ümumi rejimli cəzaçəkmə müəssisəsində çəkməlidirlər.

Qeyd edək ki, təqsirləndirilən şəxslər Baş Prokurorluq yanında Korrupsiyaya qarşı Mübarizə İdarəsi əməkdaşları keçirilən əməliyyatla saxlanılıblar.

Saxlanılan şəxslər hər biri rüşvət almaqda təqsirli bilinərək barələrində Cinayət Məcəlləsinin 311.3.2-ci (təkrar rüşvət alma) maddəsi ilə cinayət işi başlanılıb.