Ermənistanın Baş naziri Nikol Paşinyanın Vaşinqton sənədləri üzrə müzakirələrin sentyabrdan başlayacağı barədə açıqlaması diqqət mərkəzindədir. Bu bəyanatın prosesin uzadılması, yoxsa yeni mərhələnin başlanğıcı olub-olmaması müzakirə olunur.
Mövzu ilə bağlı KONKRET.az-a danışan politoloq Aytən Qurbanova bildirib ki, Paşinyanın açıqlaması sentyabrdan etibarən yeni bir mərhələnin başlanması kimi dəyərləndirilə bilər:
“Düşünürəm ki, indiki mərhələdə verilən bəyanatlar qismən də olsa Vaşinqtonda əldə olunan razılaşmaların icrası ilə bağlı müəyyən iradə nümayiş etdirildiyini göstərir. Sentyabrda prosesin başlanması onsuz da vaxt tələb edən addımların yeni mərhələyə keçidi deməkdir. Çünki Vaşinqtonda əldə olunan razılıqlara əsasən, kommunikasiya xətlərinin bərpası və sülh prosesi ilə bağlı Ermənistan kifayət qədər öhdəliklər götürüb. Bu öhdəliklərin hər biri mərhələli şəkildə həyata keçirilməlidir”.
Politoloqun sözlərinə görə, bu mərhələnin icrası müəyyən zaman kəsimi tələb edir:
“Sentyabrda nəzərdə tutulan müzakirələri ilkin addım və yeni bir mərhələnin başlanğıcı kimi qiymətləndirmək olar. Növbəti mərhələdə götürülən öhdəliklərin ardıcıl şəkildə yerinə yetirilməsi ilə bağlı real nəticələri müşahidə edə biləcəyik. Mən indiki bəyanatları manipulyativ və prosesi uzatmaq məqsədi daşıyan qeyri-konstruktiv yanaşma hesab etmirəm. Ən azından Ermənistan tərəfi götürdüyü öhdəliklər fonunda daha ciddi və məsuliyyətli davranmağa məcburdur”.
Aynurə İsmayıl
KONKRET.az