Şimali Makedoniya tarixində ilk dəfə qadın prezident seçilib. Aparıcı müxalifət partiyası olan Daxili Makedoniya İnqilab Təşkilatı – Makedoniya Milli Birlik Demokratik Partiyasının (VMRO-DPMNE) namizədi Qordana Silyanovska-Davkova prezident seçkisinin ikinci turunda seçicilərin 65,04% səsini qazanıb.

KONKRET.az xəbər verir ki, bu barədə ölkənin Dövlət Seçki Komissiyası (DSK) məlumat verib.

Bildirilib ki, seçicilərin 29,25%-i “Makedoniya Sosial Demokrat İttifaqı”nın dəstəklədiyi hazırkı prezident Stevo Pendarovskiyə səs verib.

Dövlət Seçki Komissiyasının sədri Aleksandr Daştevski səsvermənin dinc və demokratik şəraitdə keçdiyini bildirib.

Qordana Silyanovska-Davkova artıq mətbuat konfransı keçirib, o, seçicilərə dəstəyə görə təşəkkür edib və bu andan etibarən respublikanın bütün vətəndaşlarının prezidenti kimi çıxış edəcəyini bəyan edib.

Sosial-demokrat Pendarovski artıq məğlubiyyətini etiraf edib.

“Nəticələr aydındır, amma mənim vicdanım təmizdir. Nəticələrə əsasən, qalibləri təbrik etmək və onlara növbəti beş ildə uğurlu iş arzulamaq istəyirəm”, – deyə o bildirib.

Qeyd edək ki, aprelin 24-də keçirilən prezident seçkisinin birinci turunda Silyanovska-Davkova təxminən 40 faiz, Pendarovski isə 20 faizdən az səs toplamışdı.

Şimali Makedoniyada, eyni zamanda, parlament seçkisi də keçirilib. Parlament seçkisində də müxalifət – VMRO-DPMNE-nin rəhbərlik etdiyi “Sizin Makedoniya” koalisiyası qalib gəlir. Səsvermə bülletenlərinin 78,2 faizinin nəticələrinə görə, VMRO-DPMNE – 42,5 faiz, Makedoniya Sosial Demokrat İttifaqı (SDSM) isə 14,5 faiz səs toplayıb.

Bu gün ölkədə yeni hökumətin formalaşdırılması ilə bağlı danışıqlara başlanacağı gözlənilir. Nəticədə VMRO-DPMNE lideri Xristian Mitskoski baş nazir ola bilər. (Oxu.az)