Qarabağdakı separatçı qurumun qondarma “xarici işlər naziri” David Babayan “Artsax” və Azərbaycan arasında birbaşa danışıqların mümkünlüyünü şərh edib.

KONKRET.az xəbər verir ki, “Armenpress”ə müsahibəsində Babayan vurğulayıb ki, Azərbaycan-Qarabağ münaqişəsinin həlli üçün 1994-cü ildə ATƏT-in Budapeşt sammitində qəbul edilmiş aydın format var.

“Problem ondadır ki, “Artsax”ın həm danışıqlarda, həm də münaqişədə tərəf kimi tanınması formatını saxlamaq lazımdır. Əlbəttə, biz Azərbaycanla birbaşa danışıqlara hazırıq, lakin bu prosesə ATƏT-in Minsk Qrupunun həmsədrləri, Azərbaycan, “Artsax” və Ermənistanın cəlb olunması ilə münaqişənin hərtərəfli həllinə ehtiyac var. Biz birbaşa danışıqları başqa cür qəbul edə bilərik, lakin əgər söhbət siyasi məsələdən gedirsə, o zaman Azərbaycan bizim subyektivliyimizi qəbul etməli və “Artsax”ı münaqişənin tamhüquqlu tərəfi kimi qəbul etməlidir, o zaman biz bərabərhüquqlu danışıqlar apara biləcəyik”, deyə David Babayan bildirib.

“Macəraçılıqdan çəkinmək lazımdır. Bizim təbii müttəfiqlərimiz, qardaş ölkələrimiz var. Ümumiyyətlə, erməni xalqı yəhudilər kimi bir çox, bir çox ölkələrlə, hətta bir-biri ilə münasibətləri pis olan ölkələrlə normal münasibət qura bilən nadir xalqlardandır. Bizim diasporumuz var və erməni icmalarının olduğu bütün ölkələrlə yaxşı münasibətlərimiz olmalıdır. Bu, bizim maraqlarımıza uyğundur, bu, o demək deyil ki, biri digərinin hesabına həyata keçirilməlidir, mən bunu qəbuledilməz hesab edirəm”, – deyə Babayan bildirib.

O xatırladıb ki, Rusiyada 3 milyon erməni yaşayır.

“Niyə biz anti-Rusiya olmalıyıq, xüsusən də gələcəyimiz ondan asılı olan halda? Əgər Rusiya sülhməramlıları olmasa, Artsax da olmayacaq. Bu o demək deyil ki, biz Qərbin düşməni olmalıyıq. ABŞ-da 2 milyon erməni var. Həqiqətən qərbyönlülüyün yeganə meyarı rusofobiya olmalıdır? Bu normal deyil. Biz uzun müddət ərzində obyektiv şəkildə inkişaf etmiş təbii müttəfiqimizlə yaxşı münasibətlər qurmağa borcluyuq. Ümumiyyətlə, istənilən sivilizasiyanı öyrənmək, ona hörmət etmək, oradan hansı faydalı şeylər əldə etmək barədə düşünmək lazımdır, məncə, bu, düzgün yanaşmadır”, – deyə Babayan əlavə edib.

Günel Mikayılova,

KONKRET.az